Skënderbeu sfidon turqit e Beshiktash, në duelin e pestë të fazes së grupeve në Europa Ligë. Korçarët janë të vetëdijshëm se vetëm fitorja i mban gjallë shpresat për të vazhduar më tej garën, ndërkohë me çdo rezultat tjetër kampionët e vendit do i thonin lamtumirë këtij kompeticioni.
Megjithatë, tekniku i Skënderbeut, Mirel Josa, ishte i qetë në konferencën para ndeshjes, me ç’rast deklaron se skuadra nuk ka ndonjë objektiv të caktuar për këtë përballje.
“Nuk kemi patur objektiva të caktuara në këtë kompeticion, mirëpo duke luajtur në nivel të tillë nuk mund të jemi inferiorë. Ne do mundohemi të bëjmë një paraqitje të mirë duke i ditur cilësitë që ka skuadra e Beshiktash, njëherit edhe kundërshtari më i vështirë në grup”, theksoi Josa.
Korçarët nuk do kenë mundësinë të llogarisin në shërbimet e kapitenit Shkëmbi dhe sulmuesit Nimaga, megjithatë përbërja nuk pritet të pësojë shumë ndryshime, meqenëse Josa do të luajë me formacionin e njëjtë sikurse në ndeshjen ndaj Sporting-ut të Lisbonës.
Skënderbeu pozicionohet në pozitën e fundit të grupit H, me vetëm tre pikë.
/tesheshi.com/
