Sa përfundojnë dhe mbarojnë reklamat lidhur me punimet dhe të arriturat në sheshin “Skënderbe” në Shkup kërkohen përsëri para për përfundimin e fazës së dytë të projektit e këtij sheshi.
Sheshi ishte paraparë të ndërtohet në tre faza, me një kosto të përgjithshme prej afro 10 milionë eurove. Faza e parë përfundoi në vitin 2013, ndërsa faza e dytë përfundoi në muajin nëntor të këtij viti ku u ndërtua një tarracë në formë mbikalimi pranë bustit të Skënderbeut, me të cilën mbulohet një pjesë e bulevardit “Goce Dellçev”. Ndërkohë, faza e tretë e projektit për të cilën ende nuk kanë filluar punimet, parasheh ndërtimin e parkingut nëntokësor, por që akoma nuk dihet shuma e parave që do të kërkohen për përfundimin e së njëjtës.
Për këtë Komuna e Çairit ka kërkuar edhe 2 milionë euro, mjete plotësuese për ndërtimin e sheshit “Skënderbeu” në Shkup. Kjo gjë është pranuar dhe është parashikuar në Buxhetin e vitit 2018 të Maqedonisë. Ministri i Vetëqeverisjes Lokale, Suhejl Fazliu tha se kjo shumë është kërkuar për shpenzimet shtesesë të cilat janë paraqitur gjatë zhvillimit të punimeve ndërtimore të sheshit Skënderbeu.
“Këtë vit Komuna e Çairit ka kërkuar që një shumë prej 125 milion denarë ose 2 milionë euro ti jepet për të mbaruar projektin, për harxhimet që ata i llogarisin si të paparashikueshme dhe me vendim të qeverisë kjo kërkesë e të hollave programohet në Buxhetin e 2018-tës”, tha Fazliu.
Ndërsa milionat pritet të kalojnë në xhirollogari të Komunës së Çairit, në sheshin“Skënderbeu” tashmë kanë nisur të vërehen edhe dëmtimet e para.
Ndërkohë, nga komuna e Çairit thonë se fondet e miratuara nga ana e qeverisë për sheshin, kanë të bëjnë me zbatimin e dispozitave të përcaktuara në kontratën për ndërtimin e fazës së dytë të Sheshit, ku thuhet se pagesa e punëve të realizuara gjatë vitit 2017 do të bëhet në vitin 2018.
“Vlera e përgjithshme e mjeteve të miratuara prej 125 milion denarëve është shuma e përgjithshme që përfshin pagesën e tre kategorive: situacioneve të rregullta të punës (pagesën e punëve të rregullta të papaguara deri më tani), situacioneve për punë shtesë dhe situatave për punë të paparashikuara gjatë procesit të ndërtimit të fazës së dytë të Sheshit Skenderbeu, ashtu siç parashihet në kontratë- bëjnë me dije nga Komuna e Çairit”, thonë nga Komuna e Çairit.
Miradie Hasani – /tesheshi.com/
