Kampionët e Shqipërisë, luajnë transfertën e parë në Ligën e Europës. Korçarët tashmë ndodhen në Moskë, ku kanë zhvilluar edhe një seancë stërvitore për të testuar për here të fundit formën e lojtarëve. Lokomotiva e Moskës është sfida me të cilën do përballen djemtë e Mirel Josës, por për teknikun e Skënderbeut, rezultati nuk është një detyrim.
“Duhet të jemi sa më të kujdesshëm dhe të bëjmë një përfaqësim sa më dinjitoz pa marrë parasysh edhe nivelin e kundërshtarëve. Është e qartë diferenca ndërmjet skuadrave në kampionat dhe në Europë, por për ne rezultati nuk do jetë me detyrim. Do mundohemi të përfaqësohemi sa më mirë si klub pasi, kjo është edhe në dobi të futbollit shqiptar”, u shpreh Josa.
Përkundër që skuadra e tij është favorite, trajneri rus i skuadrës së Lokomotivës së Moskës, Igor Cherevchenko nuk e nënvlerëson Skënderbeun. Madje, nuk mungojnë edhe komplimentet për kampionët e Shqipërisë.
“Ne dëshirojmë të fitojmë, por nuk do jetë e lehtë ndaj një skuadre që vjen për t’i treguar vlera e veta. Për më tepër, Skënderbeu ka në skuadër lojtarë të shpejtë dhe me eksperiencë. Në Europë, nuk ka skuadra favorite, shikoni rezultatet e ndeshjeve të para ose atë që ndodhi në ndeshjen ndërmjet Bate Borisov dhe Romës në Champions. Por, ne do të hymë në ndeshje për të fituar me formacionin më të mirë që kemi”, përfundoi Cherevchenko në konferencën e zakonshme para sfidës.
Skënderbeu luan përballë Lokomotivës së Moskës, në ora 19:00, në sfidën e dytë të grupi H. Në duelin e parë në shtëpi, korçarët u mposhtën minimalisht, (1-0) nga turqit e Beshiktash. /tesheshi.com/
