Policia ka publikuar masat e marra në kuadër të ndeshjes Skënderbeu-Dinamo e Zagrebit, e vlefshme për fazën play-off në Ligën e Europës.
Duket se uniformat blu kanë marrë masa ekstreme për të parandaluar çdo incident të mundshëm, pasi tifozëve i ndalohet të kenë me vete nga monedhat e hekurit dhe çelësat, deri tek shishet e ujit, fishekzjarret dhe çdo vend tjetër që konsiderohet i fortë.
Takimi do të luhet të enjten në orën 20:00 në stadiumin “Elbasan Arena”, ndërsa në kuadrin e masave disa nga rrugët dhe lokalet e qytetit do të jenë të mbyllura disa orë para nisjes së takimit.
Kështu, të gjithë lokalet përreth stadiumit do të jenë të mbyllura nga ora pesë deri në përfundim të ndeshjes, ndërsa 350 punonjës policie nga Drejtoria Vendore e Policisë Elbasan, Komisaraitet vartëse të saj dhe nga FNSH-ja e Tiranës do te angazhohen për mbarëvajtjen e rendit dhe sigurisë gjate ndeshjes nderkombëtare.
Policia paralajmëron se nga hyrja e stadiumit nuk do të kalojë askush pa u kontrolluar, madje veç biletës, tifozët duhet të kenë me vete edhe kartën e identitetit.
Ndërkohë policia iu kërkon të minimizojne lëvizjen me makina brenda qytetit të Elbasanit duke filluar nga ora 16:00 e 24 gushtit.
Qarkullimi i mjeteve nga “Kryqëzimi i Romëve” deri tek rruga “Kozma Naska” nuk do të lejohet. Lëvizja me makinë do të ndalohet edhe në rrugën “Kamber Sejdini”, “Kryqëzimi i Romëve” deri tek kryqëzimi me rrugën “Kozma Naska”.
Në rrugen “11 Nëntori” nga “Kryqëzimi i Romëve” deri në dalje në unazë dhe rrugën “Kozma Naska” deri tek ish – konservimi, përreth dhe përballë stadiumit nuk do të lejohet as parkimi i automjeteve. /tesheshi.com/
