Skënderbeu mbërrin vonë në luftë për një pozitë që i mundëson kalimin tutje nga faza e grupeve. Skuadra korçare regjistroi fitoren e parë në kuadër të grupit H, pasi mposhti Sportingun e Lisbonës në Elbasan Arena (3-0).
Të besuarit e Mirel Josës kanë filluar mirë ndeshjen duke realizuar dy gola të shpejtë nëpërmjet Lilajt (15’, 19’), për t`u treguar kështu portugezëve se nata e së enjtes mbrëma ishte e rezervuar për hakmarrje. Përjashtimi direkt me karton të kuq i portierit Rui Patricio, u hapi rrugën kampionëve shqiptarë për të realizuar objektivin më lehtë seç pritej.
Në fraksionin e dytë të lojës, Skënderbeu realizon golin e “nockaut”-it. Bakary Nimaga ka shfrytëzuar një dalje jo fort të menduar të gardianit Boeck, për të qëlluar për herë të tretë në portën e portugezëve.
Pa shumë ndryshime në fushën e lojës, Skënderbeu administron me mjaft sukses minutat e mbetura dhe merr tre pikët e para të grupit, me një mundësi gjithsesi minimale për të kaluar më tej.
Korçarët renditen në vendin e fundit të klasifikimit, me një pikë prapa Sporting Lisbonës, tri larg Beshiktashit dhe pesë ndaj të Lokomotivës së Moskës. /tesheshi.com/
