Lidershipi i PD-së duhej të ishte më kujdesshëm në statusin dhe cilësinë e të huajve që fut në çadër, fizikisht ose virtualisht, duke i shpallur aleatë të saj në kauzën e shpallur të zgjedhjeve pa efektin e drogës së Ramës, sidomos kur është fjala për Hungarinë, e cila drejtohet nga një qeveri e shndërruar në “delen e zezë” të Europës, atë të Viktor Orban.
Por çuditërisht, pas takimit haptazi të Bashës me këtë të fundit në samitin e PPE-së, ku për më tepër e kumtoi përkrahjen e njeriut të Rusisë me seli në Budapest për çadrën e tij, këtë të enjte prej aty foli një tjetër hungarez në mbështetje të saj, Zsolt Nemeth, kreu i komisionit të punëve të jashtme në parlamentin hungarez, padyshim njeri i kampit Orban.
Dhe ç’qe më paradoksalja, gjithashtu dhe më qesharakja, me stilin e tij të njohur patetik deri në folklorizëm, Basha bëri një paralele mes tij dhe Orbanit e Skënderbeut me Huniadin. Por siç dihet, këta të dytët kanë qenë krejt në kahje të kundërta gjeopolitike, së paku siç i trajton historiografia e deritanishme: ata ishin aleatë të Perëndimit kundër otomanëve; ndërsa Basha e Orban, janë shndërruar sot, më pak i pari e krejtësisht i dyti, jo thjesht në bezdinë e Perëndimit, por deri në shqetësim për diplomacinë e Brukselit të një rrëshqitjeje të tyre kah interesat ruse.
Së paku me Orban nuk ka më dilema. Ai është lideri më pro-rus në Europë i cili sulmon median e lirë dhe mbyll universitetet në vendin e tij duke shqetësuar jo pak institucionet e Brukselit.
Orban i cili drejton një parti simotër me PD-në e lindur nga lëvizja anti-komuniste njësoj si PD-ja, rrezikoi të përjashtohej nga Partitë Popullore Europiane për shkak të sjelljeve të tij antidemokratike në Hungari.
Orban me sjellje prej autokrati, edhe pse kryeministër i një vendi anëtarv të BE-së ku vlerat kryesore janë demokracia dhe liria, tentoi të mbyllte një prej universiteteve më të njohura në Europë, CEU, vetëm sepse ishte themeluar prej George Soros, të cilin ai e ka shpallur armik, ndonëse është arsimuar prej tij.
Pse Basha gjen strehë tek Orban
Kur PD-në e ka braktisur CDU-ja e Merkelit dhe gjithë ndërkombëtarët, në çadrën e opozitës ishte këtë të enjte pikërisht hungarezi Zsolt Nemeth, të cilin Basha e prezantoi në një mënyrë shuëm sinjifikative: “Jam këtu për të mirëpritur kryeministrin hungarez, i cili na ka dhënë mbështetje për vendin” – duke e shpallur pra Orbanin problematik si aleatin e vetëm ndërkombëtar të tij. Edhe Nemeth nga ana e tij, një politikan me karrierë të gjatë në politikën hungareze tha në çadër se fliste në emër të kryeministrit Viktor Orban dhe se Budapesti përshëndet qëndresën 76 ditore të qytetarëve shqiptarë për kauzën e zgjedhjeve të lira e të ndershme. Por duke pretenduar se ai përveç qeverisë së tij përfaqësonte dhe BE-në, akuzoi me gjuhën e Bashës ndërkombëtarët e tjerë duke i cilësuar “të korruptuar”.
“Ju keni miq në Europë, nuk jeni të vetëm. Dua t’ju uroj për qëndresën tuaj 76 ditore. Kjo vërteton se ju keni arritur një agim të ri. Është e njëjta luftë që edhe ne e kemi bërë, ashtu siç kemi luftuar komunizmin me Viktor Orban dhe Sali Berishën. Nuk ka qenë e lehtë për fitorja ishte e jashtëzakonshme. Interferenca e të huajve është një lloj korrupsioni në Europën lindore. Ne nuk duam të shohim në Europë një narkoshtet. Ne do të t’ju mbështesim në luftën tuaj për zgjedhje të lira e të ndershme. Jam i bindur se ju do e fitoni këtë betejë, sepse e shkuara jonë është e përbashkët dhe e ardhmja jonë është e përbashkët në BE”, u shpreh Zsolt Nemeth.
Sjellja e PD-së në dy muajt e fundit i ngjan shumë sjelljes së simotrës së saj në pushtet në Hungari, veçse ndryshe nga Orban, Basha akoma nuk e ka shfaqur hapur mbështetjen ruse pas tij në këtë rrugëtim. Gjithashtu ashtu si partia e Orban edhe PD-ja i ka zemëruar simotrat e tyre europiane në PPE, deri aty sa kreu i PPE-ve Josef Daul arrin të bëjë video-konferencë me grupin e PD-së për t’i kërkuar hyrjen në zgjedhje dhe hyrjen në parlament. /tesheshi.com/
