Kreu i Rendit në Kosovë, Skënder Hyseni e ka konsideruar sukses faktin që nuk ka më Kosovarë që shkojnë të luftojnë në Siri. Duke folur në Asamblenë Parlamentare të NATO-s Rose-Roth që po mbahet në Prishtinë, Hyseni e kategorizoi si “ekstremizëm të dhunshëm” vajtjen në frontet e luftës, kundër të cilit ai tha se ka arritje.
“Në 1 vit nuk kemi regjistruar asnjë rast të shkuarjes së qytetarëve në konflikte të jashtme. Në fund të muajit shtator, kemi gjashtë raste, dy kemi konfirmuar se kanë arritur të shkojnë përmes rrugëve të ndryshme.
Nuk përjashtojmë mundësinë që ndonjë i radikalizuar të gjejë rrugë të treta, sidoqoftë rezultate janë të prekshme dhe të dukshme dhe janë rezultat i Strategjisë Nacionale për luftimin e ekstremizmit të dhunshëm përkatësisht planit të veprimit të kësaj strategjie”, tha ministri i brendshëm kosovar.
Më tej, ai vlerësoi atë që e quajti harmoni fetare, ama nën shekullarizëm: “Kosova dhe shqiptarët i shquan sensi për harmoni fetare dhe ne jemi të vendosur që këtë sekularizëm dhe këtë kulturë e harmoni e mirëkuptim fetar ta ruajmë me çdo kusht”. /tesheshi.com/
