Ish-aleati i hershëm i PS-së, kreu i PSD-së, Skënder Gjinushi, ka nisur të nxjerrë “fitime” prej logos së partisë së tij në zgjedhje duke ua dhënë atë të “deklasuarve” të PS-së.
Pas zgjedhjeve vendore të vitit 2015 kur Dritan Prifti, ish-deputet i LSI-së bëri një marrëveshje me Gjinushin për të përdorur siglën e partisë së tij në zgjedhje duke kandiduar njerëzit e tij kundër PS-së, tashmë Gjinushi e ka dhënë partinë edhe për Tom Doshin.
Tom Doshi ish-deputeti i Partisë Socialiste i cili u la jashtë listave të partisë së tij ku prej kohësh nuk ishte më as pjesë e grupit parlamentar, do të kandidojë në zgjedhjet e 18 qershorit si i pari në listën e Partisë Social Demokrate në Qarkun e Shkodrës.
Po ashtu një tjetër socialist ka marrë siglën e partisë së Gjinushit për t’u futur në zgjedhje në garë me ish-partinë e tij. Ai është Ylli Ziçishti ish –deputet i PS-së i zgjedhur në vitin 2013 në Qarkun e Korçës.
Nën siglën e PSD-së Ziçishti tashmë kryeson listën në Qarkun e Gjirokastrës.
Edhe një hyrje tjetër në listat e Gjinushit nga koalicioni qeverisës. Bëhet fjalë për deputeten e Partisë Kristian Demokrate, Mirela Ferracaku, e cila hyri në Kuvend pas heqjes së mandatit të ish-kreut të kësaj partie, Mark Frroku. Ferracaku është renditur e dyta në listën e PSD-së për Qarkun e Tiranës, fill pas kryetarit të kësaj partie, Skënder Gjinushi.
PSD-ja e Gjinushit duket se nuk ka probleme ideologjike apo anëtarësie, mjafton të jesh ‘i fortë’ dhe me pushtet që të garosh nën siglën e saj./tesheshi.com
