Deklaratat e Ilir Metës se nuk do të dekretonte kryeministrin dhe qeverinë e ardhshme, jo vetëm i ngjajnë skenarit maqedonas, ku presidenti Ivanov me një veprim të tillë futi në krizë politike vendin, por duket se frymëzohen pikërisht nga Shkupi.
Zyrtarë të lartë të VMRO-DPMNE kanë marrë pjesë në mitingun e LSI-së dje në darkë dhe mediat maqedonase që mbështesin Gruevskin i kanë thurur lavde Ilir Metës, si president i ri i Shqipërisë që ka marëdhënie miqësore me partinë që futi në krizë shtetin fqinj dhe ka mbajtur protesta kundër shqiptarëve.
Kryetari i Komunës së Shkupit Koce Trajanovski, i cili është zyrtar i lartë i partisë Nikola Gruevskit, ishte i ftuar nderi në mitingun e LSI-së ku u prit nga Meta. Ai shoqërohej nga Edmond Temelko, kryetar i komunës së Pustecit në Korçë, i dyshuar nga Prokuroria Speciale Publike në Shkup si manipulator i zgjedhjeve ne Maqedoni.
Mediat maqedonase pranë Gruevskit e bëjnë të bujshëm ardhjen e Trajanovskit në Tiranë me ftesë të Metës.
“Kryetari i Komunës së Shkupit Koce Trajanovski me ftesë të Presidentit të Republikës së Shqipërisë mori pjesë në tubimin qendror të lëvizjes së tij për Integrim Socialiste.
Në një takim në Tiranë, u ndoq nga më shumë se 100.000 anëtarë dhe përkrahës. Sipas sondazheve të ndryshme që presin zgjedhjet e ardhshme në Shqipëri, partia e Ilir Metës do të jetë një faktor pa të cilin nuk mund të realizohet qeveria e ardhshme shqiptare. Vizita e Koce Trajanovski është një konfirmim i marrëdhënieve miqësore me Ilir Metën”– shkruan Press24.mk
Trajanovski shpesh është akuzuar si diskriminues i komunitetit shqiptar në Shkup dhe partia e tij nxiti protestat antishqiptare gjatë krizës së qeverisjes. Ata bënin thirrje kundër gjuhës shqipe dhe asaj që quhej “platforma shqiptare” e Zaevit.
Në mitingun e Metës krahas zyrtarit maqedonas ishte dhe Temelko kryetar i Komunës minoritare të Pustecit në Korçë, i cili ka nënshtetësi të dyfishtë dhe është i dyshuar për parregullsi zgjedhore në Maqedoni.
Temelko është arrestuar më parë në qytetin e Manastirit nën akuzën për manipulim zgjedhjesh. Ai dhe zyrtare të tjerë maqedonas akuzohen për manipulime të procesit zgjedhor, ryshfet në këmbim të votës dhe shkelje të të drejtës për të votuar./tesheshi.com/
