“Astiri”, zona e njohur për dendësinë e ndërtimeve alla Gaza, te Unaza e Re, u zgjua mëngjesin e kësaj të martë me flakë e tym në një pallat, si te qe bombarduar nga forcat izraelite.
Shkak ka qenë një zjarr i rënë në garazhin e një prej pallateve, ku janë djegur katër automjete. Për pasojë, flakët e tymi janë ngjitur dhe te katet e larta, duke cenuar jetën e banorëve, të cilët kanë lëshuar dhe klithma për ndihmë nga ballkonet apo dritaret.
Ka qenë ndërhyrja e menjëhershme e zjarrfikëseve që kanë bërë të mundur evitimin e çdo kërcënimi të mundshëm për jetë.
Gjithsesi, siç raportohet dhe në komunikatën policore, 8 persona, banorë të pallatit, kanë mbetur të lënduar.
“Më datë 21.06.2022, në Unazë të Re, në rrugën ‘Aleksandri i Maqedonisë’, në orët e para të mëngjesit ka rënë zjarr në një garazh dhe janë djegur 4 automjete.
Si pasojë e zjarrit, janë dëmtuar lehtë dhe kanë shkuar për mjekim në spital shtetasit A. Xh., 28 vjeçe, F. J., 23 vjeçe, D. J., 27 vjeçe, I. Xh., 31 vjeçe, E. Xh., 27 vjeç, E. K., 35 vjeçe, M. B., 48 vjeçe dhe N. B., 50 vjeç, të cilët pasi kanë marrë ndihmën e parë mjekësore, janë larguar.
Grupi hetimor po punon për sqarimin e rrethanave të ngjarjes”, thuhet në njoftim. /tesheshi.com/
