Përfshirja e bizneseve të vogla në skemën e TVSH-së është kthyer në përplasjen e rradhës mes qeverisë dhe opozitës, PD dhe LSI. Dy partitë opozitare kundërshtojnë skemën me faktin se kjo do të çojë në rritjen e çmimeve dhe falimentin e bizneseve të vogla, për shkak të rritjes së kostove.
Por për mazhorancën një inisiativë e tillë do të krijojë një konkurencë të ndershme dhe do të luftojë informalitetin, ndërsa mohohet kategorikisht ndikimi në rritjen e çmimeve.
Së fundmi, kryeministri Edi Rama ka përdorur edhe argumentet e deputetit socialist Erjon Braçe, të cilin e quan një zë që kurrë nuk i ka tradhëtuar interesat e më të dobëtëve.
Duke përdorur argumentet e dhëna nga Braçe lidhur me këtë taksë, Rama ka shtuar se deklaratat e opozitës janë propagandë dhe broçkulla, të cilat po bëhen për të përhapur panik tek biznesi i vogël.
Reagimi i Ramës:
Erion Braçe është pa diskutim një zë që kurrë nuk i ka tradhtuar interesat e më të dobëtëve. Ja sa thjesht e shpjegon, kryetari i Komisionit Parlamentar të Ekonomisë e Financave, thelbin e qëllimit tonë në shtrirjen e regjimit të TVSH-së edhe tek biznesi i vogël, ndërkohë që opozitat janë bërë Front i Mbrojtjes së Informalitetit të Biznesit të Madh, duke gënjyer e propaganduar broçkulla, për të përhapur panik tek biznesi i vogël dhe aktruar rolin e mbrojtësit të të vegjëlve:
“Lulzim Basha po u shërben oligarkëve që kanë kapur ekonominë ne këtë vend! Propozimi i tij për një prag unik në 12 milionë lekë (të reja) xhiro në vit, nuk i çliron të vegjlit nga frika e pragut aktual që i shtrëngon të mos “i bien kasës”.
Jo! Nuk bëhet fare fjalë për këta “te vegjël”, kur flitet për evazionin në skemën e TVSH. Bëhet fjalë për ata të mëdhenj që kanë krijuar të vegjlit e tyre në letër, apo ata “të vegjël” në letër që janë thuajse prej vitesh të mëdhenj.
Pragu i Lulzim Bashës në 12 milion, i krijon gjithë këtij rreshti të madh të evazionit, mundësinë e artë të mos marrin nipte e as të fshihen mundimshëm pas nipteve sekondare, por të krijojnë fiktivisht biznese të tjera “te vogla”, që do kenë një xhiro deri në 12 milion. Kjo është skema që po kërkojnë oligarkët dhe Lulzim Basha po lobon në emër të tyre, duke përdorur të vegjlit”.
Më qartë se kaq nuk ka! Taksa e biznesit të vogël do të mbetet zero. Çmimet nuk ka asnjë arsye të rriten për shkak të regjimit të ri të TVSH-së në biznesin e vogël. Skema po axhustohet edhe në bazë të konsultimeve me biznesin e vogël e me ekspertët vendas e të huaj. Vitin tjetër do kemi jo vetëm më shumë të ardhura, po edhe më shumë rend ligjor e konkurrencë të ndershme në ekonomi. /tesheshi.com/
