Kryetari i Partisë Demokratike, Lulzim Basha, nuk ka pranuar të vendosë Nard Ndokën dhe Fatmir Mediun në listat e PD-së, ndërkohë që Agron Duka jo vetëm që nuk ia ka kërkuar këtë, por nuk ka vendosur as me kë të kandidojë.
Siç mësohet, në zona të nxehta do të kandidohen biznesmenë të njohur, por që janë nga fise të forta. Këto kandidatë do të jenë në njëfarë mënyre tip Doshi dhe Roshi, por do të zgjidhen pinjollë që kanë diplomë dhe s’kanë probleme me policinë.
Nënkryetari i PD-së, Edmond Spaho, tha se në zgjedhjet e 18 qershorit asnjë aleat nuk do të dalë deputet prej listave të partisë. Spaho në një mënyrë ka kritikuar edhe performancën e 2013-s.
“Eksperienca e zgjedhjeve të vitit 2013 tregoi që nuk ishte ndoshta më e mira,” ka deklaruar numri dy i PD-së.
Në vitin 2013, Sali Berisha u tregua bujar me partitë kryesore aleate, duke i bërë kryetarët e tyre pjesë të listave, një manovër kjo që rezultoi e gabuar. Shpëtim Idrizi ishte i pari që i braktisi demokratët për t’u bashkuar me Edi Ramën. Një vit më vonë të njëjtën rrugë ndoqi edhe demokristiani Nard Ndoka.
Fatmir Mediu, sipas të gjitha gjasave do të përdorë një metodë tjetër për të siguruar mandatin në qarkun e Fierit. Do të punojë për kandidatin e PD-së, që do të jetë një biznesmen nga Fieri, por që realisht do të jetë një republikan, i cili përveçse do të sigurojë daljen e tij deputet, mund t’i sigurojë një mandat PD-së nëpërmjet presjes dhjetore që përfiton si parti e koalicionit.
Të njëjtën skemë do të përdorë edhe Nard Ndoka në qarkun e Shkodrës.
Kurse për Kavajën tashmë është e garantuar që do të jetë një biznesmen, model i Roshit, nga fisi i Kazazëve.
Edmond Spaho i është vërvitur sërisht OSBE/OHDIR-it, që thotë se nuk ka kohë për përdorimin e elektronikës.
“Kërkesa për votim elektronik është detyrim ligjor. Është në mandatin e OSBE-së të jetë garant i procesit dhe jo kronometri i datës së zgjedhjeve, kështu që në këtë kuptim është në detyrën dhe përgjegjësinë e OSBE-së, që ka 25 vite në Shqipëri që kryen reforma, që të garantojë një proces të lirë dhe të ndershëm.
Ne nuk do hyjmë për të qenë fasadë në zgjedhje, apo për t’u dhënë legjitimitet zgjedhjeve të vjedhura. Nuk do lejojmë që këto zgjedhje të vidhen, dhe për këtë qëllim do përdorim çdo mjet që na lejon demokracia, pasi është vullneti i qytetarëve shqiptarë që të kenë një proces zgjedhor të besueshëm, si në të gjithë vendet e tjera”, ka theksuar Spaho.
Opozita ka braktisur komisionin e reformës zgjedhore dhe kthimi është në pikëpyetje për sa kohë kushti i saj nuk plotësohet. /tesheshi.com/
