Nga Blendi Gashi
Drejtuesit e institucioneve të shtetit në Kosovë derisa mbrojnë me ngulm objektin e kishës ortodokse serbe që gjendet në oborrin e Universitetit të Prishtinës, në anën tjetër nuk e thonë asnjë fjalë për xhaminë e rrënuar në Ibër nga serbët në vitin 1999.
Edhe pse pala kosovare që dialogon me Serbinë në Bruksel, premtoi se xhamia do të rindërtohet në vendin ku ka qenë, ky duket të jetë një mashtrim i radhës.
Personalisht ministrja për Dialog Edita Tahiri, para dy muajsh, pas një vizite që zhvilloi me kreun e Mitrovicës, Agim Bahtiri dhe kryetarin e Bashkësisë Islame të kësaj komune, Asllan Murati, deklaroi se ndërtimi i kësaj xhamie është i domosdoshëm dhe se do të ndodhë.
“Rivitalizimi i Urës së Ibrit është duke u vonuar nga BE, dhe meqenëse në afërsi të këtij plani është trolli i Xhamisë së Ibrit, një xhami e kohërave të hershme që nga shekulli XVII dhe e cila për shkak të gjenocidit serb është shkatërruar, natyrisht se rindërtimi i saj është i domosdoshëm. Me ligj i takon autoriteteve fetare dhe natyrisht që do të realizohet. Hapat ne i kemi përcaktuar në takim me kryetarin e Bashkësisë Islame të Mitrovicës dhe u pajtuam që së pari duhet të hiqet barrikada dhe kur të përfundojë ky proces t’i hapet rruga edhe ndërtimit të kësaj xhamie”, premtoi ministrja Tahiri. Por edhe kjo deklaratë e Tahirit duket se do të arkivohet në premtimet e pambajtura të politikanëve kosovarë.
Xhamia e ndërtuar qysh në vitin 1778 në veri të Mitrovicës, pranë Urës së Ibrit, e cila u dogj në prill të vitit 1999 nga forcat serbe, sipas informatave më të reja, nuk do të rindërtohet, sepse aty parashihet të ndërtohet diçka krejt tjetër: pra, një fushë tenisi.
Të paktën këtë e konfirmon analisti dhe qytetari nga Mitrovica, Nexhmedin Spahiu, i cili akuzon për tradhëti liderët e vendit si dhe myftiun Naim Tërnava.
“Vizitova punimet që po bëhen te ura e Ibrit dhe pashë se po ndërtohej fusha e tenisit në truallin e xhamisë së Ibrit, xhamisë më të vjetër në Mitrovicë, që qëndronte aty me shekuj, të djegur e rrënuar nga forcat serbe në prill të vitit 1999, dhe ndërtimi i fushës po bëhet në bazë të marrëveshjes së Brukselit.
Çdo popull normal për këtë akt do t’i dënonte me burg të përjetshëm Isa Mustafën, Edita Tahirin, Blerim Shalën, Naim Tërnaven, për tradhëti të lartë ndaj atdheut, shkatërrim të kulturës etj”, thotë analisti Spahiu.
Se xhamia nuk do të ndërtohet në një mënyrë muaj më parë njoftoi për mediat kosovare bëri të ditur edhe zyra e përfaqësuesit special të Bashkimit Evropian në Kosovë, duke konfirmuar se rindërtimi i xhamisë së Ibrit nuk është pjesë e marrëveshjes për revitalizimin e urës së Ibrit.
Pala kosovare që përfaqëson vendin në dialog në krye me ministren Edita Tahiri, duhet të japing sqarime së pari para mitrovicasve dhe mbarë qytetarëve të vendit, se kush po e pengon ndërtimin e xhamisë?
A mos vallë një gjë të tillë nuk e lejoi kryetari i Mitrovicës Veriore, Goran Rakiq i cili pas deklarimeve të Tahirit për ndërtimin e xhamisë, reagoi duke thënë se “Edita Tahiri me siguri se nuk do të konsultohet, as tash as në të ardhmen lidhur me atë se çka dhe kur do të ndërtohet në veri të Kosovës”.
Portali tesheshi.com ka tentuar të marrë një qëndrim nga ministrja për Dialog Edita Tahiri për të pyetur për çështjen në fjalë, por ajo nuk është përgjigjur thirrjeve telefonike por as pyetjeve që i janë dërguar me mesazh.
/tesheshi.com/
