Prokuroria Speciale e Kosovës ka ngritur aktakuzë në rastin e quajtur “Pronto”, ku të akuzuar janë njëmbëdhjetë persona me funksione të larta zyrtare, në mesin e tyre ministri aktual i Inovacionit, Besim Beqaj, deputetit akutal të PDK-së, Zenun Pajaziti dhe ish-deputetit Adem Grabovci, kryprotagonisti i këtij skandali.
Sipas aktakuzës, të pandehurit kanë keqpërdorur pozitat e tyre zyrtare duke bashkëpunuar në mes vete për dhënien e privilegjeve dhe përparësive kundërligjshme personave të cilët kanë konkurruar në funksione të rëndësishme, siç janë: drejtor për Ndërmarrjet publike qendrore, Kryeshef Ekzekutiv i Agjencisë së Regjistrimit në Ministrinë e Punëve të Brendshme, Kryeshef i Agjencisë për produkte medicinale dhe Koordinator i Qendrës së Regjistrimit Civil në Komunën e Klinës, duke mohuar dhe kufizuar liritë dhe të drejtat e kandidatëve të tjerë, të garantuara me ligj.
Në aktakuzë është trajtuar çështja penale e punësimeve dhe ndarjes së posteve, të bazuara në përkatësinë partiake dhe raporte personale, për të cilin problem për një kohë të gjatë alarmojnë qytetarët e Kosovës, Agjencitë për zbatimin e ligjit si dhe mediat dhe shoqëria civile.
Reagime
Ndaj ngritjes së aktakuzës ka reaguar kryeportagonisti Adem Grabovci, që ndryshe njihet si shefi i shefave i cili kritikon sistemin e drejtësisë.
“Ende nuk kam marrë asgjë me shkrim në lidhjen me këtë aktakuzë. Shihet se si vendoset drejtësia në vendin tonë. Ka afër dy vite që unë nuk jam deklaruar në lidhje me këtë çështje, pasi kam besuar në drejtësinë kosovare. Kjo aktakuzë është një padrejtësi e madhe kundër meje”, ka deklaruar Grabovci për “Betimi në Drejtësi”.
Ai ka thënë se në bisedat të cilat kanë qenë pjesë e përgjimeve, ka ofruar siç ka thënë, këshilla për votuesit e tij, duke shtuar se në asnjë rast nuk ka pasur kompetenca ekzekutive për të vendosur lidhur me punësimin e tyre.
Grabovci ka thënë se në fund të këtij procesi do të dalë i pafajshëm.
Kujtojmë se edhe pse pjesë e skandalit “Pronto” janë presidenti Thaçi e krykuvendari Veseli, ndaj tyre nuk është ngritur aktakuzë. /tesheshi.com/
