Prokurori i përgjithshëm i Maqedonisë Marko Zvërlevski, gjatë një qëndrimi dyditor në Moskë, ka nënshkruar një marrëveshje bashkëpunimi me Prokurorin e Përgjithshëm rus, Juri Çajka për marrjen e modeleve ruse si mostër kundër krimit të organizuar, korrupsionit dhe luftës kundër terrorizmit.
Nga ky bashkëpunim mund të vlerësohet se si gjyqësia, ashtu edhe prokuroria e “pavarur” maqedonase, kohët fundit po afrohet më shumë me Rusinë se sa me BE-në dhe SHBA-në.
“Autoritetet ruse, përfshirë këtu edhe prokurorinë e vendit, kanë rënë dakord për bashkëpunim me autoritetet e Maqedonisë në luftën kundër korrupsionit, terrorizmit dhe krimit të organizuar”,- ka theksuar zëdhënësja e prokurorisë së përgjithshme ruse, Marina Gridneva.
Zyra e prokurorisë ruse gjithashtu ka folur edhe në favor të forcimit dhe zhvillimit të mëtejshëm të bashkëpunimit të ndërsjellë ndërmjet autoriteteve të ndjekjes penale të të dy vendeve, në mbrojtjen e të drejtave të njeriut dhe interesat e shoqërisë dhe të shtetit, të dyja të bazuara në ligjet dhe traktatet ndërkombëtare.
“Dokumenti parasheh bashkëveprim të mundshëm në forma të ndryshme në një sërë çështjesh që bien nën juridiksionin e autoriteteve të të dyja shteteve e prokurorive Bëhet fjalë për çështje që lidhen me masat kundër krimit të organizuar, terrorizmit dhe korrupsionit dhe gjithashtu për bashkëpunimin për çështjet e ekstradimit dhe ofrimin e ndihmës juridike në lëndët penale “, tha Gridneva.
I kënaqur me këtë bashkëpunim ndërmjet dy prokurorive, është deklaruar edhe prokurori maqedonas Marko Zvërlevski. i cili ka thënë se “është shumë i rëndësishëm nënshkrimi i kësaj marrëveshje, meqë përvoja e Rusisë në luftën kundër terrorizmit, ekstremizmit dhe korrupsionit mund të jetë një mostër e mirë për institucionet maqedonase”.
Nga BDI kanë thënë se është e papranueshme të merren modelet ruse. Sipas tyre Prokuroria e Maqedonisë duhet të kërkojë dhe zbatojë modele të avancuara demokratike nga vendet perëndimore, meqë Maqedonia ka synim integrimin në vlerat euroatlantike e jo në lindje.
Pjesë e këtij delegacionit kanë qenë edhe zv/prokurori i përgjithshëm rus Genadi Lopatin, zv/kryeprokurorja Liliana Spasoska dhe zyrtarë të tjerë të lartë nga të dy prokuroritë./tesheshi.com/
