Në Prokurorinë e Tiranës kanë mbërritur të mashtruarit nga piramida më e re në vend që u kishte shitur qytetarët tollona karburante dhe më pas rezultoi një mashtrim.
Siç mësohet nga të dëmtuarit, ata janë thirrur në prokurori për të dëshmuar mbi mashtrimin.
Hetimi penal ndaj Gulf është regjistruar vetëm një ditë pasi policia ka paraqitur materialin referuar. Prokurori i çështjes ka dërguar hetuesit për të mbledhur të gjitha provat në terren, duke mos u besuar vetëm provave të policisë.
Në këtë hetim janë marrë në pyetje 5 menaxherë shitjesh me pakicë të tollonave. Sipas deklarimeve të tyre, tollonat i merrnin te selia qendrore dhe i shisnin me para në dorë te qytetarët.
“Qytetarët nisën blerjen masive të tollonave prej çmimit 40% më lirë dhe prej reklamave në media. Paratë i dorëzonim pranë firmës, as ne nuk kemi marrë ende rrogat”, kanë thënë menaxherët.
Hetimet pritet të bëhen duke pyetur edhe pjesëtarë të aksionerëve të Gulf që nuk janë larguar. Njëri prej tyre është madje edhe operator i vjetër i tregut të karburantëve dhe ka shkuar i pari në Prokurori.
Deri tani Ministria e Enrgjetikës nuk është shprehur, çka ka krijuar irritim tek qytetarët e mashtruar. Ata kërkojnë që ministria të mbrojë qytetarët në këtë rast dhe të bëjë publike qëndrimin e saj.
Çështja e Gulf-it duket si e ngjashme me rastin e Armo-s ku investitorët amerikanë u larguan ende pa ardhur. Punëtorët në Ballsh janë ende në protestë dhe kërkojnë rrogat e prapambetura. /tesheshi.com/
