Dje, deputeti që vjen nga media, Alfred Peza, i sulmuar për pasurinë e tij, deklaroi se e gjithë kjo po bëhet për të fshehur skandalin e madh, kur një sekser për privatizimin e OSHE tek CEZ tërhoqi nga një bankë e nivelit të dytë 7 milionë euro cash, ndërkohë që 20 vjet më parë për një shumë më modeste u arrestuan kupola e Bankës së Shqipërisë dhe gjysma e qeverisë së asaj kohe.
Bëhet fjalë për skandalin “Arsidi”.
Po çfarë ishte ky skandal dhe ç’ndodhi atëherë?
Qeveria e asaj kohe trashëgoi një borxh mjaft të madh, që administrata e Ramiz Alisë, por edhe e Enver Hoxhës, kishin marrë në mënyrë të fshehtë dhe që ia lanë barrë ekzekutiveve demokratike.
Në atë kohë në Tiranë u shfaqën të parët si gjithnjë sekserët, apo siç njihen sot dhe i pëlqen Henri Çilit t’i quajë, lobues.
Nicholas Arsidi, një bankier francez, së bashku me një lobues tjetër ambasadorin Jean Paul Carteron, një diplomat zviceran që drejton Forumin e Crans Montana-s, morën përsipër të negoconin borxhin e jashtëm të Shqipërisë.
Të dy i dhanë edhe një medalje Presidentit të atëhershëm të Republikës, Sali Berisha.
Arsidi dhe Carteron morën nga Banka e Shqipërisë si honorar për punën e tyre 1.6 milionë dollarë cash që dolën nga Thesari i Shtetit dhe jo me çek.
Shuma ishte pjesë e 10 përqindëshit free që ndodh zakonisht në marrëdhëniet e biznesit.
Kjo u quajt skandal, pasi shkeleshin rregullat financiare të BSH-së.
Dy vjet më vonë, në vitin 1993 nisi një hetim.
Kjo shumë e marrë nga Arsidi por që sipas gjasave edhe Carteron ka marrë pjesën e tij, është e përcaktuar dhe në marrëveshjen e nënshkruar nga qeveria shqiptare.
Nga Thesari i Shtetit dolën këto para për të paguar biznesmenin francez, por që më pas u zhdukën dhe nuk dihet se ku kanë shkuar.
Vetë Arsidi nuk ngriti ndonjë çështje gjyqësore ndërkombëtare për të kërkuar fitimin, apo për të gjetur të drejtën se kujt ia ka dhënë ato para. Prokurori i asaj kohe, Maksim Haxhia (që më pas u shkarkua) arrestoi funksionarë të lartë të shtetit: ish-kryeministrin Vilson Ahmetin; Ilir Hotin, guvernatorin e Bankës së Shqipërisë; Agim Tartarin, Drejtor i Bankës së Kursimeve; Agron Saliun, zv.Guvernator.
Të gjithë u liruan më pas një nga një nga gjykata e Tiranës. Vetë Arsidi pat dëshmuar në gjyqin e tyre më 1995 se i ka dorëzuar në dorë Ilir Hotit 1.3 milionë dollarët.
Mediat e kohës shkruan se Berisha e ka pasur mik Arsidin dhe ky fakt u vërtetua, sipas tyre, me një dekoratë që Arsidi i dha Berishës: Urdhrin e Kortezisë Franceze.
Asgjë nuk është sqaruar për këtë çështje, edhe pse në gjyq për të dëshmuar për skandalin “Arsidi” ishin kërkuar të paraqitet Fatos Nano, si kryeministri i parë pas viteve 1990; presidenti Berisha, kryeministri Meksi; si dhe ministrat Rexhep Uka e Genc Ruli.
Jean Paul Carteron, Presidenti i Forumit Ekonomik Botëror në Crans Montana, ka qenë avokati i Berishës për çështjen “Arsidi” në Paris, duke iu referuar gazetës “Rilindja Demokratike” të kohës.
Më 1995, Carteron ishte për herë të parë në Shqipëri për të negociuar që paratë t’i kthehen Shqipërisë, por nuk dihet se si kanë përfunduar këto negociata. Dihet vetëm rezultati: paratë nuk iu kthyen më vendit. Edhe dëshmitari i vetëm që mund të flasë për këtë çështje, Nikolas Arsidi, tashmë ka vdekur dhe nuk mund të vërë më gishtin mbi përfituesit e 1.6 milionë dollarëve. /tesheshi.com/
