Jo vetëm në Shqipëri kanë dalë probleme me tekstet shkollore, por gafa flagrante janë bërë dhe në një nga shtetet me arsimin më të përparuar në Evropë dhe botë, sikurse është Danimarka.
Shtëpia botuese daneze “Lindhardt & Ringhof” ka botuar një tekst mësimor tejet “interesant” për nxënësit e shkollave të mesme. Sipas hartës së botuar në libër, gjatë luftës së ftohtë në përbërje të Bashkimit Sovjetik hynin Norvegjia veriore, Finlanda, si dhe Turqia, njofton gazeta daneze në gjuhën angleze “The Copenhagen Post”.
Në libër, në përfytyrimin e autorit të tekstit mësimor, “fuqia e BRSS” nuk kufizohet: Greqia dhe “Federata Ballkanike”, në të cilën, sipas autorëve, hynin Shqipëria, Jugosllavia dhe Bullgaria, në tekst quhen “vende të tjera komuniste”, kurse shtetet e Lindjes së Mesme paraqiten si “aleatë të Bashkimit Sovjetik”. Në Bashkimin Sovjetik “hyn” gjithashtu dhe Turqia, e cila që nga viti 1952 ka qenë anëtare e NATO-s. Përveç kësaj, landi gjerman Shlezvig-Holshtajn (Schleswig-Holstein), që nga 1949 pjesë e ish-Gjermanisë Perëndimore, sipas autorëve të tekstit, në periudhën e luftës së ftohtë i përkiste ish-Gjermanisë Lindore.
Sikurse shkruajnë mediat, teksa hartonin tekstin mësimor, kolektivi i autorëve huazoi plotësisht një hartë të sajuar nga islandezi Andri Jonsson, hartë të cilën dikur e kishte hedhur në rrjetin social për piktorët “Deviant Art”. Vetë krijuesi i hartës alternative të Evropës, pasi mësoi për çka kishte ndodhur, ishte habitur dhe nuk dinte si ta shpjegonte këtë gjë.
“Së pari, unë mendoj se botuesit nuk e kanë parë me vëmendje hartën dhe gabuan për shkak të nxitimit”, komentoi redaktori i kompanisë “Lindhardt & Ringhof” Stefan Dybdal Emker (Emkjær), i cili është përgjegjës për botimet mbi historinë dhe shkencat humanitare. Dhe doli se redaktori e njeh shumë keq historinë. “Nuk kam fjalë për të shpjeguar këtë mungesë profesionalizmi”.
Sipas përfaqësuesit të kompanisë, personi përgjegjës për publikimin e kësaj harte, ka anashkaluar disa hollësi. Stefan Dybdal Emker siguroi gjithashtu se së shpejti autorët e tekstit do të paraqesin një hartë më të korrektuar të Evropës së pasluftës. Sipas tij, me tekstin mësimor po njihen mësuesit, dhe asnjë nga librat nuk ka shkuar deri tek nxënësit 16-19-vjeçarë. Shitja e teksteve u pezullua, botuesi premtoi të botojë një version të ri, të redaktuar.
Përgatiti: Mark Brunga – /tesheshi.com/
