E paralajmëruar me shumë bujë, ka rezultuar një flluskë “materiali i tmerrshëm” me në qendër një ministër të kabinetit qeveritar publikuar në emisionin investigativ STOP në TV Klan.
Një eksponent partiak i PS-së së Tropojës, njëherësh zyrtar Shëndetësie, duke qene dy herë në varësi të ministrit Beqja, e akuzonte atë për klientelizëm dhe kërcënim, duke ofruar si fakt një bisedë telefonike mes tyre. Por nga kjo e fundit nuk ka patur asgjë anormale.
Beqja i kërkonte vartësit të tij llogari për mungesën në një mbledhje asambleje, ndërsa ky i fundit i thoshte se ashtu e kishte patur një hall familjar. “Pse nuk lajmërove” – e pyeste Beqja, dhe ai i përgjigjej se “nuk e kishte parë të arsyeshme për ta lajmëruar”.
Dhe biseda përfundonte me fjalët e ministrit thënë vartësit: “Të uroj suksese në jetë”, ku pikërisht kjo frazë përkthehej nga ky i fundit si kërcënim.
Edhe sikur vërtet ministri të ishte në gabim në atë lloj problematike, tek e fundit brenda sinoreve partiake, kush e dëgjoi dialogun mes tyre e vuri re të zakonshmen deri në rëndomësi të fjalosjes mes tyre ku nuk kishte asgjë për t’u konsideruar si skandal.
Për rastin konkret, skandal ishte përpjekja gazetareske për të shitur si skandal diçka që nuk ishte aspak e tillë. /tesheshi.com/
