Ka përfunduar pa arritjen e një kompromisi për të rrugëtuar së bashku, takimi mes grupit parlamentar dhe Kryesisë së Lëvizjes Vetëvendosje.
Ish-kryevetëvendosësi Visar Ymeri pas mbledhjes ka deklaruar se zgjidhja e vetme për VV-në është heqja dorë nga interesat personale, pa treguar nëse e ka fjalën për kandidimin e Albin Kurtit për kryetar të partisë.
“Mendoj se secili duhet të heq dorë nga vetja për të mirën e organizatës dhe mendoj se kjo do të kishte me qenë zgjidhja për organizatën. Sot nuk jemi dakorduar dhe nuk e di nëse do të dakordohemi. Nuk shoh asnjë përafrim. Nuk shoh asnjë vullnet që të diskutohet mbi zgjidhjen e problemeve. Konsideroj se Lëvizja Vetëvendosje është në një fazë të rëndësishme, dhe secili individ do duhej të vendoste organizatën para vetes”, tha Ymeri.
Kurse kryetari i Prishtinës, Shpend Ahmeti, tha se i vetmi pajtim në këtë takim ishte për vazhdim të diskutimeve.
“Problemi është i dukshëm dhe ka probleme të theksuara. Nuk kemi arrit që të gjejmë marrëveshje apo dakordim për rrugën përpara. Së paku u dakorduam që të diskutojmë. Një problem që është krijuar për kohë të gjatë vështirë që mund të zgjidhet për katër orë”, tha Ahmeti.
Ai ka sqaruar pozicionimin e tij, pas zhvillimeve të fundit brenda partisë.
“Kur më kanë pyetur mua se cili është pozicioni juaj, i kam thënë se jam kryetar i Komunës së Prishtinës. Unë dua ta mbaj Vetëvendosjen të bashkuar. Poqëse nuk është e mundur, atëherë pozicionet do t’i bëjmë të ditura. Natyrisht se nuk jemi të lumtur, as unë si kryetar as deputetët, sepse të ndarë jemi shumë më të dobët”, tha Ahmeti. /tesheshi.com/
