Ashtu edhe siç pritej, Këshilli Drejtues i PDK-së e ka nominuar zyrtarisht Kadri Veselin për kryetar të Kuvendit. Ky vendim është marrë në mbledhjen e mbajtur sot, duke i dhënë edhe kompetenca të tjera kryetarit të PDK-së.
Këtë e ka bërë të ditur nënkryetari i kësaj partie, Rexhep Hoti, i cili ka thënë se shefi i partisë ka marrë mandat edhe të propozojë emrat e ministrave në qeverinë e re si dhe emrat e kandidatëve për kryetarë të Komunave.
Ky zyrtar i PDK-së ka konfirmuar për mediat kosovare se kanë biseduar për qeverinë e re, por jo edhe për numrat, e koalicionit PDK-AAK-NISMA.
“Asnjë dyshim s’ka se do të jemi pjesë e qeverisë. Këtë na e ka besuar sovrani dhe s’ka asnjë luhatje në këtë drejtim”, ka shtuar ai.
Kujtojmë se seanca e Kuvendit është caktuar për 3 gusht. Aty, pritet të votohet për kryetarin e Parlamentit dhe nënkryetarët.
Të drejtën kushtetuese për pozitën e kryetarin të Parlamentit e ka PAN, koalicioni fitues i zgjedhjeve, derisa partitë tjera kanë pozitat e nënkryetareve. /tesheshi.com/
