Situata aktuale politike në Kosovë dhe protesta e paralajmëruar nga partia më e madhe në Kosovë, Lëvizja Vetëvendosje, pikërisht më 1 shtator, ditën kur fillon viti i ri shkollor, ka bërë që të shtyhet fillimi i vitit të ri shkollor.
Ministria e Arsimit në Kosovë mori vendim, që të shtyjë deri më 5 shtator ditën e parë të shkollës, me arsyetimin e mos sigurimit në tërësi të teksteve shkollore dhe materialeve të tjera.
Por, sigurisht ky është veç një arsyetim i MASHT, pasi Arsim Bajrami, ministri i Arsimit ditë më parë njoftoi se mësimi do të nis më 1 shtator.
Por, protesta e nesërme ka bërë sigurisht që MASHT të ndryshoi mendim edhe pse kështu zyrtarisht nuk deklarohen nga ministria në fjalë.
Se a ka pasur ndonjë ndikim eventual, në marrjen e vendimit, situata politike aktuale në vend, zyrtarë të Ministrisë se Arsimit nuk kanë pranuar të deklarohen, pavarësisht përpjekjeve për të siguruar një përgjigje të plotë.
Ndryshe, më 1 shtator Kuvendi i Kosovës pritet që të diskutojë dhe më pas edhe votojë për ratifikimin e Marrëveshjes me Malin e Zi për shënjimin e vijës kufitare.
Kjo marrëveshje për disa muaj po kundërshtohet nga partitë opozitare, disa nga të cilat edhe kanë paralajmëruar protesta brenda dhe jashtë objektit të Kuvendit të Kosovës, për siç kanë thënë, pamundësimin e jetësimit të kësaj marrëveshjeje.
Sidoqoftë, jo gjithmonë viti i ri shkollor ka filluar më 1 shtator, pasi disa herë, greva pikërisht në këtë datë patën organizuar Sindikata e Arsimit, Shkencës dhe Teknologjisë, duke kërkuar rritjen e pagave e më pas edhe përmirësimin e kushteve për mësim dhe punonjës të arsimit. /tesheshi.com/
