Franca ka kërkuar sot nëpoërmjet ministrit të saj të Jashtëm një takim të menjëhershëm të Këshillit të Sigurimit të OKB-së për të diskutuar gjendjen në Halep, qytetin sirian të kthyer në gërmadhë nga luftimet.
“Më shumë se kurrë më parë, ne duhet t’i vëmë ngutshëm në lëvizje mënyrat për ‘u dhënë fund luftimeve dhe për ta lejuar ndihmën humanitare të kalojë e papenguar,” deklaroi Jean-Marc Ayrault.
Ushtria siriane e regjimit të Esadit ka njoftuar një ditë më parë për marrjen e një pjese të madhe të lindjes së Halepit, gjer më tash të kontrolluar nga kryengritësit.
Këta të fundit humbën tërë lagjet veriore të pjesës lindore të qytetit, çka ka nxitur largimin e mijëra civilëve.
Katastrofike e përshkroi situatën një zëdhënës i Helmetave të Bardha. “Njerëzit po flejnë në rrugë. Nuk kanë asgjë për të ngrënë apo për të pirë…”
Humbja e pjesës lindore të Halepit do të ishte një goditje e rëndë për kryengritësit, që deri tani u kanë rezistuar ofensivave të njëpasnjëshme. /tesheshi.com/
