Kryeministri Rama iu është rikthyer apeleve koronare, siç në javët e krizës, ditë pasi përcolli të fundit, duke menduar se nuk do jetë më e nevojshme në kushtet e hapjes.
Por rritja e bëftë e infektimeve, ka bërë që ai të dallojë sindromin e lopës te qytetarët.
“Do bëhemi njerëz e do zbatojmë rregullat, apo do bëjmë si lopa që i bie me shqelm qumështit pasi e mbush, por jam shumë i shqetësuar se nuk kam ndërmend të bëj sehir se si shumë e kanë harruar që koronavirusi nuk ka ikur”, tha Rama.
Ai paralajmëroi rikthim të karantinës nëse vijon trendi negativ i ditëve të fundit, ku janë shënuar rekorde deri me mbi 40 në ditë, të papara as në kulmin e krizës.
“Prej 3 ditësh kemi më shumë shtrime në spital se në kulmin e tij, nuk dua të lëshojë ofensivën ndëshkimore për bizneset që nuk respektojnë protokollet, e di mirë se sa kanë vuajtur, por nuk kam ndryshuar mendim, ekonomia bie dhe ringrihet, të vdekurit jo. Nuk dua që ndëshkimet të jenë as për njerëzit moskokëçarës, tani që jemi hapur. E di se sa kanë duruar të gjithë dhe kur solidariteti i pashoq na nxori faqebardhë, nuk dua ta mendoj karantinën.
Nëse vazhdojmë kështu dhe nuk ndryshojmë sjellje që sot dhe numrat e të shtruarve do të rriten, atëherë me keqardhje po realisht nuk do kemi çfarë të bëjmë dhe do duhet të kthehemi nga e para. Prandaj, të thërrasim mendjen dhe të bëjmë gjënë e duhur, e kemi vetë në dorë që të bëjmë gjënë e duhur, të ringrihemi shpejt, të shërohemi nga plagët dhe të bëjmë atë që na takon”, tha Rama. /tesheshi.com/
https://www.facebook.com/edirama.al/videos/545834549632998/?t=1
