Nga Blendi Gashi
Kriza politike në Kosovë po tensionon çdo ditë e më shumë situatën e sigurisë në vend.
Djegia e veturave të zyrtarëve të shtetit dhe familjarëve të tyre por edhe së fundmi gjuajtja me koktej molotovi e objekti të Kuvendit konkretisht tentimit për të djegur zyrat e Presidencës është një paralajmërim i qartë se situata mund të merr përmasa shqetësuese.
Përkundër kësaj, institucionet përgjegjëse të sigurisë vazhdojnë të jenë në gjumë të thellë.
Çuditërisht, Policia e Kosovës asnjë person nuk ka arritur ta vë në pranga edhe pse aktet e tilla po ndodhin në mes të kryeqytetit.
E gjitha çfarë dihet aktualisht është se veprimet e tilla po bëhen nga personat e maskuar, të paktën kështu kanë raportuar mediat kosovare.
Për këtë që po ndodh asnjë fjalë të vetme nuk e ka thënë as njeriu kryesor aktualisht që është përgjegjës për të folur për sigurinë, ministri i Punëve të Brendshme Skënder Hyseni. Poashtu, ka heshtur edhe drejtori i Policisë së Kosovës, Shpend Maxhuni.
Por kjo heshtje e tyre dhe mosveprimi i policisë për të kapur “maskat”, edhe pse ata që disa javë po trazojnë sigurinë në vend, është një skandal i madh për çka edhe duhet të kërkohet llogari prej tyre, pasi në pozitat që mbajnë nuk janë veç për të vjelur të mirat shtetërore por edhe për të dhënë përgjegjësi.
Ekspertët e sigurisë: Kosova po hyn në “zonën e nxehtë”
Njohësit e çështjeve të sigurisë në Kosovë shprehin shqetësimin e tyre se situata e sigurisë në vend po rrëshqet drejt shpërthimit , derisa bëjnë apel që institucionet përgjegjëse të jenë më syçelë dhe autorët e sulmeve t’i vënë para drejtësisë.
Burim Ramadani, ekspert i sigurisë thotë se hedhja e koktej molotovit në objektin e Kuvendit të Kosovës dhe të dhënat policore për njerëz me maska si autorë, nxisin disa pyetje të rëndësishme si; A po hyn Kosova në “zonën e nxehtë” nga brenda? Dhe A është duke e shfrytëzuar situatën e përgjithshme të sigurisë ndokush që ka qëllime kundër shtetit të Kosovës?
“Kohë më parë kam shkruar për “faktorin e tretë” dhe mundësinë e shfrytëzimit të jostabilitetit politik nga “faktori i tretë” për ta prekur thellë sigurinë kombëtare të Kosovës. Sidoqoftë, është tejet me rëndësi që institucionet e sigurisë të veprojnë menjëherë. Ndërsa, institucionet politike të Kosovës të vendosin frymë bashkëpunuese brenda shoqërisë kosovare”, thotë eksperti Ramadani, për tesheshi.com.
Avni Islami, njohës tjetër i çështjeve të sigurisë, thotë se djegia e veturave të zyrtarëve të shtetit lë hapsirë për të kuptuar se këto veprime janë të motivuara politikisht dhe se qëllimi i tyre është një mesazh i qartë, se kursi politik i udhëhequr nga qeveria e tanishme nuk po i pëlqen dikujt.
Kurse gjuajtjen me molotov në objektin e Kuvendit ku u tentua të digjet zyra e Preisdencës, Islami e sheh si një paralajmërim për presidentin e zgjedhur Thaçin se ai nuk do ta ketë të leht ta ushtroj këtë funksion.
“Një pjesë e përgjegjësisë bie dhe mbi institucionet e sigursë se duhet më shumë të punojnë. Ato duhet të janë më aktive e sidomos sistemi i sigurisë me kamera, ku duhet me kohë ta lajmëron bazën dhe në mënyrë të sinkronizuar të kapen autorët dhe të dalin para drejtësisë”, thotë Islami për tesheshi.com.
Policia: Sulmuesit u larguan me veturë të bardhë
Policia e Kosovës në raportin 24 orësh ka zbuluar detaje të reja për sulmin e ndaj objektit te Kuvendit të Kosovës, përkatësisht ndaj zyrës së Presidencës.
“Me datën 12.03.2016 rreth orës 04:00 është raportuar se disa persona të dyshuar të maskuar kanë hedhur koktej molotov në drejtim të ndërtesës Presidenciale. Personat e dyshuar pas hedhjes së koktej molotovit dyshohet se janë larguar në drejtim të rrugës Agim Ramadani me një veturë ngjyrë të bardhë. Fillimisht dyshohet se me gurë e kanë thyer xhamin e dritarës ku kanë tentuar që ta hedhin shishen e molotovit, çka nuk kanë arritur pasi që shishja është goditur në muri ku shihet një sipërfaqe e murit rreth një metër e nxirë me rastin e thyerjes së shishes, ku derivatet janë djegur në atë pjesë të murit. Njësia policore ka dalë menjëherë në vendngjarje, mirëpo nuk është arritur të hasen të dyshimtit”, ka thënë policia.
Ndryshe, hedhjen e molotovit në objektin e Kuvendit e kanë marrë përsipër “Qytetarët e pakënaqur”, duke sqaruar se tentimi i tyre ka qenë me djegë objektin e Kuvendit. Ata i kanë bërë thirrje Hashim Thaçit e Kadri Veselit që të largohen nga koalicioni me Isa Mustafën. /tesheshi.com/
