Presidenti egjiptian do të vizitojë pas dy ditësh Uashingtonin, në të parën vizitë zyrtare në Shtëpinë e Bardhë. Abdel Fattah ai-Sisi do të kërkojë të lërë një periudhë të ftohtë të marrëdhënieve mes dy vendeve, posaçërisht gjatë mandatit të dytë të presidentit Obama.
Ndërsa Barack Obama do ta pezullonte përkohësisht ndihmën ushtarake për Egjiptin pas rrëzimit të Mohamed Morsi-t, një marrëdhënie shumë më e ngrohtë mes Trump-it dhe Sisi-t është paralajmëruar që me takimin e shtatorit të shkuar.
Takimi mes dy shtetarëve do të përqendrohet në çështjet e sigurisë dhe në ndihmën ushtarake, teksa Egjipti ka patur tradicionalisht një rol në aleancat rajonale të SHBA-së, si dhe ka përfituar në mënyrë të përvitshme një ndihmë ushtarake prej 1.3 miliardë dollarësh.
“Ai [Trump-i] kërkon ta shfrytëzojë vizitën e Sisi-t për t’i përtërirë marrëdhëniet dypalëshe,” deklaroi një ditë më parë një zyrtar i Shtëpisë së Bardhë.
“Egjipti ka qenë një partner i besueshëm i SHBA-së për dekada,” u shpreh gjithashtu ai.
Egjipti është një aleat i ngushtë i SHBA-së në rajon, dhe al-Sisi e ka shprehur qartë kënaqësinë për qasjen e Trump-it ndaj vendit të tij.
“Presidenti Trump ka treguar mirëkuptim të madh për çfarë po ndodh në rajon dhe në Egjipt,” do të thoshte ai në një intervistë.
Një tjetër udhëheqës i Lindjes së Mesme, mbreti Abdullah II i Jordanisë, do të ketë po ashtu një takim të mërkurën e ardhshme me presidentin Trump. /tesheshi.com/
