Në një fjalim në pallatin presidencial, presidenti egjiptian Abdel Fattah al-Sisi ka shpallur gjendjen e jashtëzakonshme në vend.
“Do të ndërmerren një seri hapash, me më të rëndësishmen, shpalljen e gjendjes së jashtëzakonshme për tre muaj,” deklaroi Sisi në fjalën e tij.
Vendimi erdhi pas shpërthimeve të dielën në dy kisha kopte që lanë më së paku 44 të vrarë. Në një afat tremujor, gjendja e jashtëzakonshme mundëson bastisjen e shtëpive dhe ndalimet nga policia pa urdhër arrestimi.
Sipas kushtetutës së vendit, vendosja e gjendjes së jashtëzakonshme duhet të marrë miratimin e parlamentit brenda një jave.
Sisi pati urdhëruar më herët dislokimin e ushtrisë në tërë vendin për të mbrojtur infrastrukturën jetike.
Përgjegjësinë për shpërthimet në kishat në dy qytete të Egjiptit e mori ISIS-i. Shpërthimet u kryen nga dy kamikazë, pohuan përgjegjësit për ngjarjet tragjike. /tesheshi.com/
