Abdulfettah es-Sisi anuloi ditën e djeshme udhëtimin për në Afrikën e Jugut, për të marrë pjesë në Samitin e Unionit Afrikan, pasi një grup avokatësh paraqitën një kërkesë ligjore zyrtare për arrestimin e tij.
Presidenti egjiptian pritej të mbërrinte në Johanesburg të premten, por një burim nga presidenca njoftoi se delegacionin do ta udhëhiqte kryeministri, Ibrahim Mehlebi. I njëjti burim shtoi gjithashtu se Egjipti e kishte informuar zyrtarisht vendin pritës për ndryshimin e udhëheqësit të delegacionit.
“Ne besojmë se es-Sisi bëri krime lufte dhe krime kundër njerëzimit me vrasjet që rezultuan nga grushti i shtetit në Egjipt,” deklaroi një anëtar i Shoqatës së Avokatëve Muslimanë Afrikanojugorë (MLA).
Ai u shpreh se vizita e es-Sisit ishte një mundësi e mirë që autoritetet afrikanojugore ta arrestonin, ta hetonin dhe ta procedonin atë për krimet e pretenduara.
“Ka shumë persekutim dhe vrasje të anëtarëve të Vëllazërisë Muslimane, si dhe të mbështetësve të saj,” shtoi Yousha Tayoub-i.
Qeveria afrikanojugore e pati kritikuar ashpër rrëzimin e Mursit dhe shtypjen e mëpastajme të disidentëve politikë prej autoriteteve egjiptiane të mbështetur nga ushtria. /tesheshi.com/
