Sulmet raketore të SHBA-së ndaj një baze ajrore në Siri, një përshkallëzim i situatës në rajon, janë cilësuar si akt agresioni si nga regjimi sirian, ashtu dhe nga rusët.
Kështu, televizioni shtetëror sirian e ka quajtur akt agresionin sulmin mbi objektivat ushtarake në territorin e Sirisë.
Siç lajmëron CNN-i, Viktor Ozerov, kryetari i komisionit të mbrojtjes në Këshillin e Federatës Ruse, ka deklaruar se, “Ky është një akt agresioni kundër një anëtari të OKB-së.”
Ozerov ka paralajmëruar për një ndërprerje të bashkëpunimit me ushtrinë amerikane pas sulmit, duke nënvizuar gjithashtu: “Sulmet amerikane mbi bazën e aviacionit sirian mund të minojnë përpjekjet në luftën kundër terrorizmit në Siri. Rusia do të kërkojë një takim të ngutshëm të Këshillit të Sigurimit pas sulmeve ajrore amerikane mbi bazën e aviacionit sirian.”
Në të njëjtën frymë është dhe reagimi i Iranit, që i dënon sulmet raketore të SHBA-së.
Zëdhënësi i Ministrisë së Jashtme iraniane, Bahram Qasemi, i ka deklaruar agjencisë së lajmeve ISNA: “Ne e dënojmë fuqimisht çdo veprim të njëanshëm ushtarak dhe sulmin raketor mbi bazën ajrore Shajrat në Siri nga flota luftarake amerikane…”
Pozitiv ka qenë reagimi i Koalicionit Kombëtar të opozitës siriane, që thekson se me sulmin amerikan i jepet fund periudhës së “pandëshkueshmërisë”, e se ky duhet të jetë vetëm fillimi.
Sulmi me raketa mbi bazën ajrore Shajrat në provincën e Homsit u krye në orët e para të së premtes, e përbën goditjen e parë të drejtpërdrejtë amerikane ndaj objektivave të regjimit sirian në gjashtë vite konflikt. /tesheshi.com/
