Një studim i fundit i kryer nga një organizatë bamirësie në ndihmë të grave të prekura nga kanceri i gjirit, ka arritur në përfundimin se zbatimi i një diete specifike, ul rrezikun e kësaj sëmundjeje.
Dietologia Michelle Harvie, e cila udhëhoqi studimin shpjegon karakteristikat e dietës, e cila rezultoi mjaft e suksesshme. Mjekja thotë se dieta quhet “5:2”, që do të thotë se dy herë në javë femrat duhet të ndryshojnë mënyrën e ushqyerjes, ndërsa pesë ditët e tjera, ato mund t’i rikthehen normalitetit.
Ditët që janë në dietë ato duhet të bëjnë shumë kujdes që të hanë ushqime që nuk përmbajnë shumë karbohidrate. Në këtë mënyrë, mjekët thonë se në trup do të rritet përqëndrimi i proteinave, të cilat kanë efekt pozitiv në qelizat e gjoksit.
Proteinat i bëjnë këto qeliza më të qëndrueshme, më të forta e për rrjedhojë trupi është më i mbrojtur nga rreziku i sëmundjes. Mjekët shprehen optimistë se kjo lloj diete është një masë parandaluese shumë e mirë, por nuk mund të thonë me siguri nëse shërben pozitivisht për femrat të cilat janë prekur nga kanceri i gjirit.
Megjithatë, Michelle Harvie thotë se studimet në këtë fushë vazhdojnë në mënyrë që t’u vijnë sa më shumë në ndihmë grave që të parandalojnë ose luftojnë sëmundjen e rrezikshme. /tesheshi.com/
