Gerard Pique luan gjithmonë me doreza në dimër, por kur flet, “i heq gjithnjë dorezat”.
Mbrojtësi i Barcelonës në një intervistë dhënë për The Telegraph, ka dhënë opinionin e tij për disa çështje, qofshin sportive, shoqërore apo politike. “Shtylla” e mbrojtjes spanjolle në këtë dekadë, deklaroi se largimi i Neymar ishte një rrufe në qiell të hapur.
“Me Neymar jemi miq. Është djalë shumë i mirë dhe e respektoj, por nuk mund ta ndaloja. Si tifoz dhe shok, ikja e tij na dëmton shumë. Nuk para gjen lojtarë me klas të tillë sot, që të mund të shndërrohen në flamur të skuadrës” – është shprehur Pique.
Megjithatë, mbrojtësi shton se uron që Neymar të fitojë Topin e Artë tek PSG. I pyetur për trajnerët me të cilët ka punuar, 31-vjeçari nuk e fsheh admirimin për Guardiolën. “Në 4 vitet që punuam me Pep kemi fituar shumë, por edhe jemi argëtuar. Luanim futbollin më të bukur në botë dhe sot shumë trajnerë po përpiqen të fusin sistemin e tij të lojës. E gjenim me sy mbyllur njëri-tjetrin në fushë. Shikojeni se çfarë gjërash të mëdha po bën me Manchesterin” – shprehet Pique.
Ndërsa duke folur për çështjen e Katalonjës, Pique deklaroi se vendi i tij duhet të marrë pavarësinë, sepse njerëzit e këtë duan dhe vullneti i tyre duhet respektuar. /tesheshi.com/
