Ilir Meta i ka kushtëzuar Edi Ramës koalicionin në zgjedhjet e 2017-s, pas deklaratës së kryeministrit se Shpëtim Idrizi do të ketë hapësirë më të madhe në aleancën e re.
Në fjalimin e tij të mbajtur në Konventën e LSI-së, Meta ka sulmuar aleatin e tij kryesor në ato tre pikat në të cilat e godet edhe opozita: arroganca, kanabisi dhe Greqia
Meta tha se ka arrogancë në qeverisje; përmendi kanabisin si një problem kombëtar, si dhe paralajmëroi qeverinë se po sillet aq keq me Greqinë sa LSI distancohet nga këto qëndrime.
Ndërkohë, Luan Rama ka dalë në darkë dhe në një intervistë për Top Channel ka folur për një opozitarizëm të LSI-së brenda qeverisë; një rol “spartan” që Ilir Meta kërkon ta mbajë pas ndëshkimit të ministrave të qeverisë “Rama” të cilët nuk i futi fare në kupolën e partisë.
“Në fund të mandatit të parë qeverisës duhet bërë një bilanc, që nuk është rozë dhe një anallizë realiste në funksion të asaj çfarë duhet përmirësuar është shenjë serioziteti e koalicionit dhe shenjë respekti ndaj besimit qytetar. Nuk duhet të flasim me gjuhën e 1 milion shuplakave, siç dëgjon retorikën euforike të qeverisë. Ne duhet të dëgjojmë qytetarin dhe të fokusohemi tek shërbimi. LSI duhet të ketë një rol frenues të kësaj arrogance të pushtetit dhe të fokusohet tek shërbimi”, tha Luan Rama pas konventës.
Por një gjë ra në sy në Konventën Zgjedhore të LSI-së: ashtu siç Ilir Meta u ftua dhe ishte prezent në Kongresin e PS-së madje me fjalim, tek LSI nuk u pa asnjë prej drejtuesve të selisë rozë, madje as deputetë.
Po pse ky teatër absurd, çfarë po ndodh realisht?!
Artur Zheji, një analist që është pranë Ilir Metës, në shkrimin e tij për Konventën shkruan:
Në fjalën e tij, Kryetari i Kuvendit dhe lideri i forcës politike që mbështet maxhorancën e sotme qeverisëse, bëri një bilanc, pothuajse krejtësisht negativ, në të gjitha fushat më sensitive të qeverisjes së vendit, nga arsimi te kanabisi, nga papunësia te konflikti politik, nga mjekësia te largimet masive të shqiptarëve nga vendi i tyre, në kërkim të një jete më të mirë, në interes të familjeve dhe fëmijëve të tyre.
Nëse kjo është panorama e Shqipërisë, që sheh dhe percepton Meta dhe nëse ky është bilanci i rezultateve të bashkëqeverisjes me PS dhe me kryeministër Edi Ramën, duket se kjo Konventë, është një hap më larg, ripërtëritjes së kontratës politike të LSI me PS dhe se kemi të bëjmë me një ftohje parazgjedhore kuptimplotë Meta-Rama.
Nëse e thotë Zheji, diçka di; por problem është se Ilir Meta nuk mund të vendosë sot se çdo të bëjë në qershor. Ka shumë frikë për “ekspansionin çam” ndaj po e sulmon fort, madje edhe me aksione ndërkombëtare siç ishte vizita në Athinë.
Vetë Rama, deklaroi publikisht para një muaji se Metën e pres deri në dhjetor, as një minutë më shumë që të vendosë për koalicionin.
Ndërkohë Meta si përgjigje i largon të gjithë ministrat nga kupola e LSI-së dhe në fjalimin e tij gjuajti me spond ata “deputetë që e kanë mendjen tek tenderat”, që ishte pikërisht goditje për të tijtë që kanë flirtuar me Ramën.
Po çfarë do të vendosë LSI-ja sot në platformën politike?
Dy janë variantet: ose t’ja lërë kryesisë ose KDK-së kompetencën për të negocuar për aleancat 2016; që do të thotë Ilir Metës. Megjithatë vetë Meta do të duhet t’ja japë përgjigjen aleatit të tij përpara dhjetorit. Natyrisht Kreu i LSI-së pret ta bëjë pas mbledhjes së ministrave të Jashtëm të BE-së ku do të flitet për negociatat. Dhe sipas të gjitha gjasave është drejt largimit. Nuk e përmend kot edhe Artur Zheji…/tesheshi.com/
