Ka marrë trajektore të ithët politika shqiptare duke marrë ushqim edhe nga ngjarje të ditës kur akuzohen zyrtarë të rëndësishëm.
Menjëherë pas takimit të tensionuar të dy ambasadorëve, Lu dhe Vllahutin me grupin parlamentar të PD-së, një zhvillim i ri ka ardhur në Kuvendin e Shqipërisë. Pikërisht kur mungon kryetari i tij Ilir Meta.
Ministri i Brendshëm, Saimir Tahiri, e ka shprehur në mënyrë të qartë dhe të hapur qëndrimin e Partisë Socialiste në Parlament nëse dështon miratimi i reformës në drejtësi.
E përmendur nga kryeministri Edi Rama, një muaj më parë, Tahiri theksoi se parlamenti nuk ka legjimitetin e tij nëse nuk e miraton reformën në drejtësi.
“Hajdeni ta votojmë reformën në drejtësi, pse rrini këtu?! Lërini pretekstet për të mos votuar reformën në drejtësi. Nëse nuk doni ta votoni thojeni hapur, është më e ndershme. Dy alentariva ka: ose parlamenti ose reforma në drejtësi. Ky parlament nuk ka legjitimitet nëse nuk miratohet refoma në drejtësi. Të gjithë e duan refomën, përveç atyre që kanë frikë. Doni ta votoni, hajde shkojmë ta votojmë. Kjo është ajo që kërkojmë”, tha Tahiri.
Deklarata e Ministrit të Brendshëm u bë pikërisht në kohën kur kryetari i LSI-së Ilir Meta nuk ndodhet në Kuvend, dhe madje as në Shqipëri. Ai nuk mori pjesë në takimin e ambasadorëve Lu e Vllahutin në selinë e LSI-së.
Ndërkohë, një deputet i LSI-së, Përparim Spahiu, në një editorial të shkruar në gazetën Panorama pak ditë më parë, ironiznte në mënyrë të hapur turin e dy ambasadorëve.
“Kam shkuar në klasë me shami dhe thonj të prerë”, theksonte Spahiu, i cili nuk ka një profil të lartë politik, por qëndrimi i tij, duke pasur parasysh dhe atë çka LSI-ja është, ku çdo gjë kalon nga Ilir Meta, kihet parasysh se kemi të bëjmë me një rezistencë më të madhe.
Siç bën të ditur zyra e shtypit e Kuvendit, Meta është takuar me dy kongresmenë, kryetarin komisionit të Ligjeve dhe Procedurave, Pete Sessions dhe kryetarin e komisionit për Sigurinë Kombëtare, Michael Mçaul.
“Meta tha se po bëhen përpjekje që reforma në drejtësi të realizohet me sukses, e cila është kyçe për të ardhmen e vendit. Ndërsa nga ana e tyre kongresmënet shprehën interes për avancimin e reformës”, theksohet në njoftim.
Megjithatë mungesat e mëdha në takimet e dyshes Lu-Vllahutin janë një indikacion i qartë për atë që duket se do të ndodhë në marrëdhëniet e SHBA-BE-së me politikën shqiptare.
Për kë u dha paralajmërimi i Saimir Tahirit sot në sallën e Kuvendit, ku u kërcënua hapur se vendi do të shkojë në zgjedhjet 45 ditë pas votimit të reformës në drejtësi, nëse dështon miratimi?! Natyrisht jo ndaj Partisë Demokratike, por aleatit të ngushtë LSI, tek e cila është rihapur çështja e zyrtarëve klientelistë e trafikantë të lidhur me nëntokën e politikës shqiptare.
Mungesa e Ilir Metës në mbledhjen ku ishte prezent Donald Lu me Romana Vllahutin është vënë re si një zhvillim i rëndësishëm.
Kreu i LSI-së vërtët ishte për vizitë në Uashington për takime në kongres, por takimin e Vllahutin mund edhe ta zhvillonte më parë apo më pas.
Tashmë ka nisur numërimi mbrapsht. Donald Lu e ka një regjistër ku i ka shikuar mungesat e tij, dhe ai sipas të gjitha gjasave i ka bërë llogaritë se sa vota janë në Kuvend për reformën.
Megjithatë, deklarata e Tahirit ka dhënë një sinjal tjetër. Atë që tesheshi.com e ka paralajmëruar dy javë më pare: që Shqipëria po shkon drejt zgjedhjeve të parakohshme. /tesheshi.com/
