Po qarkullon këto ditë një grup skenaresh, që synon shtyrjen e zgjedhjeve të 18 qershorit, deri në ndryshimin e disa rregullave zgjedhore që opozita, por jo vetëm, pritet t’i deklarojnë publikisht.
Siç mësohet, ekzistojnë dy variante për çështjen e zgjedhjeve të 18 qershorit, megjithëse ato janë dekretuar zyrtarisht nga Presidenti Bujar Nishani.
Varianti i parë është që zgjedhjet të mbahen me këtë datë siç është dekretuar por opozita do të kërkojë që Presidenti i Republikës të mos zgjidhet nga ky Parlament, por nga i riu që do të dalë nga votimet dhe të përshpejtohet thirrja e tij jo në shtator, por në fund të korrikut, siç ndodhi me zgjedhjet aktuale në Maqedoni.
Varianti i dytë është që zgjedhjet të shtyhen në fund të shtatorit, pasi të jenë qartësuar më mirë koalicionet në muajin prill, kur pritet që Ilir Meta të zyrtarizojë largimin nga aleanca me Edi Ramën.
Vetë Lulzim Basha nuk ka marrë vendim as për koalicionet, e as për ngritjen e strukturave zgjedhore në parti.
Ndërkaq edhe Ilir Meta e ka shtyrë Konventën Zgjedhore të partisë që do të duhej të mbahej që në dhjetor, e sipas Ylli Manjanit ajo pritet të zhvillohet në muajin prill.
Një tjetër sinjal i rëndësishëm është se Kuvendi që drejtohet nga Ilir Meta, duket të kishte nisur procedurat apo publikimin e procedurave për zgjedhjen e Presidentit të ri të Republikës, mandate të cilit mbaron në qershor.
Po me sa qershor? Para apo pas zgjedhjeve?! Ja është dilemma…
Pas këtyre sinjaleve ka nisur fuqishëm kundër-ofensiva e socialistëve.
Partia Socialiste i ka konsideruar qesharake dhe reflektim i frikërave të brendshme kërcënimet e përsëritura të Partisë Demokratike, e cila ka paralajmëruar se ’97 do të duket lule nëse ajo do të humbasë zgjedhjet e ardhshme parlamentare.
Deputeti socialist, Arben Çuko, tha se kërcënimet e Partisë Demokratike për destabilizimin e vendit nuk duhen marrë seriozisht.
Sipas tij, kërcënimet reflektojnë frikën e opozitës shqiptare nga humbja në zgjedhjet e 18 Qershorit 2017.
Ndërsa deputeti socialist Pjerin Ndreu është shprehur për “Report TV” se nuk ka shtyrje dhe se kërcënimet paralajmërojnë humbjen e PD në zgjedhjet e ardhshme parlamentare.
/tesheshi.com/
