Nga Mensur Krasniqi
Pas shumë akuzave dhe kundërakuzave ndërmjet tyre, kryetari i Lëvizjes për Reforma në PDSH, Ziadin Sela ka tejkaluar inatet dhe ka mbledhur forcën, kështu duke i ofruar ftesë publike Lëvizjes BESA që të bashkëpunojnë në bazë të parimeve të barabarta, pa matur forcat paraprakisht se kush është më i forti.
E gjithë kjo sipas tij, meqë te shqiptarët është mbjellur ideja se vetëm me bashkimin opozitar, gjegjësisht të dy lëvizjeve, mund të mundet BDI-ja, ndryshe situata edhe pas zgjedhjeve do mbetet status-quo.
“Jemi të interesuar për bashkëpunim, pa asnjë kusht. Ofrojmë bashkëpunim në bazë të parimeve të barabarta, pa matur forcat se kush është më i forti. Për të ndryshuar gjendjen e shqiptarëve duhet unifikim i domosdoshëm. Parimet janë të njëjta. Albin Kurti ka prezantuar platformë të përbashkët, lista të përbashkët, dhe e treta koordinim i aktiviteteve të përbashkëta. Por Besa atëherë na tha se herët është që të bëjmë lista të përbashkëta. Është ndërtu shpresa se vetëm me bashkim opozitar mundet BDI. Prandaj dikush po luan rolin e kalit të Trojës, që të mos ndodhë ky unifikim. Por unë jam i bindur se opozita kësaj radhe do të fitojë bindshëm”, ka deklaruar Ziadin Sela si mysafir në emisionin “Click Plus” të tv21.
E njëjta sipas tij vlen edhe tani kur Këshilli Opozitar dha një propozim për të protestuar më 9 maj lidhur me ngjarjet e Lagjes së Trimave.
“Nëse duan të bëjmë bashkë, të paktën të bëjnë një telefonatë dhe të bashkërendojmë aktivitetet. Kjo garë që po ndodhë po eliminon nismat për bashkëpunim dhe unifikim opozitar”, ka shtuar Sela.
Kësaj ftese të Ziadin Selës, në një prononcim për portalin tesheshi.com, anëtari i Kryesisë Qendrore të Lëvizjes BESA, Zeqirija Ibrahimi i’u është përgjigjur në mënyrë koncize dhe të qartë se pa përfunduar procesi i përçarjes brenda RDK-së nuk mund të flitet për bashkëpunim. Ndryshe do të akuzohej Lëvizja BESA se po mban anën e Vesel Memedit apo Fadil Zendelit, si kryetar legjitim të partisë së RDK-së, parti kjo e cila për momentin ka lidhur Aleancën për Shqiptarët bashkë me Ziadin Selën.
“Pa përfunduar procesi në RDK nuk mund të flasim për bashkëpunim. Sepse ashtu i bie se po ndërrhyjmë dhe po marrim anë, ndërsa kjo nuk i shërben unifikimit të opozitës”, deklaroi eksluzivisht për tesheshi.com, Zeqirija Ibrahimi.
Nga ana tjetër, edhe analisti i njohur politik shqiptar, Mersel Bilalli vlerëson se deklarata e Ziadin Selës për bashkëpunim të bllokut opozitar është e imponuar nga realiteti në terren, meqë nuk mund të pritet të mundet BDI- pa bashkim të forcave të opozitës.
“Pra, nuk mund të kemi ndryshime radikale nëse nuk kemi bashkim të faktorit i cili do t’i kundërvihej një politike të tillë, një politike fatkeqe për të gjithë popullatën shqiptare, e në veçanti për rininë. Prandaj e shoh si imponim duke mos përfillë aq shumë orientimet, proviniencat ideologjike të partive e majtë apo e djathtë ose e mesme. Qëllimi është që së paku të bëhet një ndryshim radikal ku do të startohet prej zero. E gjithë kjo avari që ka ndodhur nuk mendoj se është problem i ndryshimit të politikës por problem thjesht i një shpëtimi të përgjithshëm”, kështu shprehet për portalin tesheshi.com, analisti politik Mersel Bilalli. /tesheshi.com/
