Komisionerja Evropiane për Zgjerim Marta Kos shprehu besimin e saj se gjatë këtij mandati të Komisionit Evropian (2024-2029) të paktën një vend në procesin e zgjerimit do të arrijë “finishin” dhe do t’i bashkohet Bashkimit Evropian, duke vlerësuar se për momentin liderët në këtë proces janë Shqipëria dhe Mali i Zi.
“Mali i Zi ka një vizion për të përfunduar negociatat deri në vitin 2026 dhe Shqipëria në 2027. Ne do t’i mbështesim, por duhet shumë punë. Parimi i një procesi të bazuar në merita duhet të zbatohet si për vendet kandidate ashtu edhe për vendet anëtare të BE-së”, tha Kos.
Duke iu referuar përafrimit të vendeve kandidate me politikën e sanksioneve të Bashkimit Evropian (BE), Kos tha se asnjë vend që nuk është 100 për qind në përputhje me Politikën e Përbashkët Evropiane dhe të Sigurisë nuk do të mund të anëtarësohet në Bashkimin Evropian.
“Ky është parimi që do të ndjek. Ajo që mund të kemi parasysh është se nuk mund të ndodhë brenda një dite ose, të themi, në një periudhë të shkurtër kohore. Pra, edhe ne po i ndjekim me shumë vëmendje zhvillimet. Dhe ne sigurisht që do ta bëjmë këtë edhe me Serbinë”, tha Kos.
Ajo po ashtu shprehu pritjen se do të ketë progres në procesin e normalizimit të marrëdhënieve pas zgjedhjeve në Kosovë, të cilat do të mbahen më 9 shkurt.
Ajo pranoi se qasja e administratës së ardhshme amerikane do të ndikojë në angazhimet evropiane.
“Në Kosovë do të ketë zgjedhje. Nuk pres që të bëjmë ndonjë hap përpara zgjedhjeve. Por shpresoj që së shpejti pas zgjedhjeve do të mund të ecim përpara, sepse nuk mund të flasim për Ballkanin Perëndimor nëse nuk flasim për dialogun ndërmjet Beogradit dhe Prishtinës, apo veçmas për atë që po bën Kosova dhe çfarë po bën Serbia. Të gjithë presim datën 20 janar dhe çfarë vendimesh do të marrë presidenti amerikan ditën e parë. Kjo do të ndikojë edhe në punën tonë”, tha Marta Kos.
Kos tha gjithashtu se disponimi për zgjerim tani është dukshëm më pozitiv se në vitet e kaluara.
“Për herë të parë në dhjetë vjet, ne kemi një perspektivë realiste që gjatë këtij mandati të mund të sjellim të paktën një, për mendimin tim edhe dy ose tre vende të tjera drejt qëllimit,” tha Kos.
Ajo pranoi se agresioni i Rusisë kundër Ukrainës kishte hapur mundësinë për zgjerim të mëtejshëm, por theksoi se nuk kishte rrugë të shkurtra në procesin e anëtarësimit.
“Nuk do të ketë ‘koncesione’ politike. Procesi i zgjerimit mbetet i bazuar në merita”, nënvizoi Kos. /tesheshi.com/
