Menjëherë pasi u diagnostikua me kancer të prostatës, një burrë nga Karolina e Veriut, SHBA, filloi të fliste me një theks irlandez, pavarësisht se nuk e kishte vizituar kurrë këtë vend europinoverior të Britanisë së Madhe.
Sindroma e rrallë dhe paradoksale vazhdoi deri në vdekjen e tij.
Fenomeni është regjistruar në një artikull në British Medical Journal. Është hera e parë që regjistrohet te një pacient me kancer të prostatës dhe vetëm hera e tretë që regjistrohet tek një pacient me kancer.
Në artikull, për arsye të dukshme, nuk ka shumë informacione të tjera për pacientin, përveç se ai ishte rreth 50 vjeç. Ai kishte jetuar në Britani më shumë se tre dekada më parë dhe kishte miq dhe të afërm të largët në Irlandë.
“Theksi i tij ishte i pakontrollueshëm dhe gradualisht u bë i përhershëm”, raportojnë studiuesit. Fillimisht u shfaq rreth 20 muaj pas fillimit të trajtimeve të kancerit dhe nuk u largua edhe pse gjendja e pacientit u përkeqësua.
Testet neurologjike nuk treguan asgjë të dyshimtë dhe ai nuk kishte as histori psikiatrike. Mjekët dyshojnë se sindroma është për shkak të çrregullimit neurologjik paraneoplastik (PND), një “sulm” i sistemit imunitar të pacientit në tru dhe sistemin nervor.
Sindroma e theksit të huaj ka filluar të regjistrohet vitet e fundit në mbarë botën, raporton BBC. Disa nga pacientët me sindromë raportuan se kishin dëgjuar një “zë të huaj” kur flisnin.
Një nga rastet e para të regjistruara ishte në vitin 1941 kur një grua e re nga Norvegjia filloi të fliste me një theks gjerman pasi u godit nga një cifël bombe. Enturazhi i saj u distancua nga gruaja, sepse ata mendonin se ajo ishte një spiune e gjermanëve. /tesheshi.com/
