Sindikata e Pavarur e Radio-Televizionit të Kosovës ka reaguar ndaj një postimi të kryeministrit Mustafa në Facebook ku shprehet se ai dhe partia e tij nuk janë duke ndërhyrë në punën e RTK-së.
Sipas sindikatës, RTK-ja është larg depolitizimit. Kryetari i sindikatës së RTK-së Fadil B. Hoxha, ka sqaruar për opinionin se tre anëtarë të bordit të RTK-së kanë kontratë pune me ministrinë e Arsimit, dhe për kryetar të Bordit është zgjedhur personi i cili ishte në krye të tij edhe në kohën kur mbi 60 redaktorë e gazetarë të RTK-së ngritën zërin kundër censurës në këtë media publike.
“Sa i përket mbikëqyrjes parlamentare, deputetët e partisë që ju drejtoni nuk janë në gjendje të iniciojnë hetim parlamentar në RTK, me gjithë vërejtjet e auditorit të përgjithshëm për parregullësi të mëdha në këtë institucion”, ka thënë Hoxha.
RTK, sipas tij, ka nevojë urgjente për veprime konkrete pasi, siç thotë, degradimi i institucionit si në rrafshin financiar e ligjor, ashtu edhe në atë programor e organizativ nuk ka të ndalur.
“Me gjithë borxhet milionëshe, punësimet e pakontrolluara dhe lidhja e kontratave në kundërshtim me ligjin, po vazhdon. Pagat e punëtorëve të RTK-së janë duke u siguruar falë zemërgjerësisë së telekomit të Kosovës për të reklamuar në RTK dhe kredive në bankat komerciale”, sqaron Hoxha.
“Këtë rrënim të medias së vetme publike në vend po e bën stafi menaxhues, pa u penguar nga askush. E gjithë kjo po ndodh para syve tanë”, ka theksuar Hoxha. /tesheshi.com/
