Sindikata e pavarur e RTK-së njoftoi se stafi menaxhues i institucionit të vetëm publik të medias në Kosovë ka nisur procedimin për konkursin e marrjes në punë të 22 personave.
Fadil B. Hoxha, kryetar i sindikatës tha se stafi menaxhues i televizionit, që është në fund të mandatit, ka vendosur me veprimet e fundit, që ta rrënojë RTK-në deri në nivelin përtej riparimit.
“Ai po tregohet hapur mospërfillës ndaj kuvendit të Kosovës, auditit të përgjithshëm, bordit të drejtorëve dhe publikut i cili është financuesi kryesor i RTK-së”, tha Hoxha.
Me këto veprime, sipas tij, stafi menaxhues i RTK-së, po e tregon hipokrizinë e tij, duke e paraqitur në njërën anë gjendjen financiare në RTK-së si të rëndë, ndërsa në anën tjetër çdo ditë e më shumë krijon detyrime të reja financiare për të”, ka theksuar Hoxha.
Sindikata i kërkon bordit të drejtorëve të RTK-së, të deklarohet rreth këtij punësimi dhe të tregojë se:
– çfarë ka ndodhur me vendimin e këtij viti të bordit, për ndërprerjen e punësimeve në RTK
– si do të mbulohet kostoja e këtij punësimi, kur dihet se RTK ka rreth 4.3 milion euro borxhe./tesheshi.com/
