Dëshira për të ikur nga Shqipëria dhe për të fituar azil në një nga vendet e Bashkimit Europian e ka shtyrë një 34-vjeçar të simulojë një ngjarje kriminale, por që plani i tij nuk ka arritur të realizohet falë punës së policisë së Dibrës, ku edhe ka ndodhur ngjarja.
Vetë policia lajmëron se më datë 2 maj, pra ditën e djeshme, është ndaluar Femi Nezha, i cili banon në lagjen “Laprak” në Tiranë. Sipas bluve të Dibrës, Nezha kishte shkuar në Lurë tek xhaxhai i tij, Q.N. dhe më datë 30 prill, rreth orës 23.00, dyshohet se ka simuluar ngjarjen ku vetë ai ka qëlluar me armë zjarri në murin e banesës së xhaxhait të tij.
Pas këtij veprimi Nezha ka njoftuar fillimisht median e më pas policinë, ku ka treguar se është qëlluar me armë në drejtim të banesës së xhaxhait te tij ku ndodhej edhe vetë ai.
Nga veprimet profesionale dhe hetimore të kryera nga policia rezultoi se autori i dyshuar i kësaj ngjarje është vetë Femi Nezha pasi dyshohet të ketë simuluar ngjarjen me qëllim përfitimin e statusit të azilantit në vendet e BE-së.
Gjithashtu ai ka kryer veprime që pengojnë zbulimin e së vërtetës duke fshehur gëzhojat në vendngjarje.
Policia mundi të gjejë dhe sekuestrojë një gëzhojë dhe një predhë plumbi në faqen e murit të banesës së shtetasit Q.N.
Materialet i kaluan Prokurorisë Rrethit Gjyqësor Dibër për veprat penale “Prodhim dhe mbajtja pa leje e armëve luftarake dhe e municionit”, “Veprime që pengojnë zbulimin e së vërtetës”.
Femi Nezhës, në javën e parë të muajit Prill 2016 i është refuzuar statusi i azilkërkuesit në Gjermani dhe është kthyer së bashku me familjen në Shqipëri. /tesheshi.com/
