Lista Serbe paralajmëron kryeministrin Mustafa se nuk do t’i kthejë përfaqësuesit e saj në institucione, në rast se ekzekutivi nuk i qaset seriozisht themelimit të Asociacionit të Komunave me shumicë serbe, konfirmojnë përfaqësuesit e kësaj liste.
Kryetar i këstij subjekti, Slavko Simiq, thotë se themelimi i Asociacionit është me interes vital për serbët që jetojnë në Kosovë.
Por, sipas tij, nëse themelimi i Asociacionit nuk bëhet sipas kërkesave të subjektit të tij, e që siç thotë ai, ato bazohen mbi principet e marrëveshjes së Brukselit, përfaqësuesit e kësaj liste nuk do të kthehen në institucione.
“Nuk ka kthim përderisa nuk respektohen principet bazë të marrëveshjes së Brukselit. Do të thotë, Gjykata Kushtetuese mund të rrëzojë gjithçka. Ne nuk mundemi që për gjithçka që merremi vesh në Bruksel dhe më pas, kur jemi në terren, nuk mund të zbatojmë asgjë për shkak të sistemit legjislativ dhe kushtetues”, ka deklaruar Simiq për Radio “Evropa Lirë”.
Kryeministri Mustafa, disa herë ka ripërsëritur ftesën ndaj përfaqësuesve të kësaj liste që të kthehen në institucionet qendrore, në mënyrë që të fillojë puna për krijimin e Asociacionit, por që nuk ka marrë ndonjë përgjigje prej tyre. /tesheshi.com/
