Shumica e mediave, në raportime ose komente lidhur me rastin e Metës, vetëshpalljes së tij si tribun i mbrojtjes së Kushtetutës, gjithnjë duke pretenduar se ajo po shkelet nga mazhoranca, nuk marrin në konsideratë simetrinë e problemit; pra faktin, se dhe mazhoranca pretendon të njëjtën gjë, e që për këtë arsye ka vendosur dhe ta shkarkojë. Vlen kjo dhe për rastin e pretendimeve të kreut të shtetit se mazhoranca kërkon që të kap Gykatën Kushtetuese, pasi dhe kjo e fundit ka të drejtë të pretendojë të njëjtën gjë ndaj Metës. Thënë kjo, edhe mazhoranca mundet të organizojë të njëjtën protestë me popullin e saj, pra elektoratin e saj nën thirrjen se presidenti po përdhos Kushtetutën.
Ja si mund të ndodhë.
Deklaratë:
Mazhoranca socialiste, në kushtet kur gjendet përballë një presidenti që po shkel rregullisht Kushtetutën, vendosi që të reagojë me forcën e popullit për t’i treguar vendin një njeriu që në rolin e kreut të shtetit, e ka kthyer Kushtetutën në një letër pa vlerë në shumë akte.
Kutojmë këtu mosdekretimin e dy ministrave, që ishin dhe sinjali i parë i një shkeljeje të hapur, e cila do arrinte kulmin me anullimin e zgjedhjeve lokale të 30 qershorit, e cila nuk gjen askund referencë më Kushtetutë në ato që janë kompetencat e presidentit. Kjo do pasohej dhe me akte të tjera, siç është ajo e refuzimit të Arta Vorpsit si e votuar e parlamentit për anëtare të Gjykatës së re Kushtetuese.
Siç dihet, për çdo rast ne i jemi drejtuar Venecias, për të patur prej saj një opinion, e ku deri më tani, nga ky komision kemi tejkalimin e kompetencave në rastin e anullimit të zgjedhjeve. Por të gjithë këto rrugë janë ezauruar, e tashmë që presidenti ka dalë nga çdo binar kushtetues, i mbetet popullit të vendosë për të. Ndaj, në ftojmë popullin që t’i dalë për zot Kushtetutës, të cilën po ia përdhos presidenti i vet, ku si qëllim final mbetet bllokimi i ngritjes së institucioneve të drejtësië së re.
Nëse mazhoranca pra zgjedh të njëjtën qasje, dhe ka të drejtë ta bëjë këtë gjersa dhe ajo e akuzon kreun e shtetit për shkelje të Kushtetutës, ç’mund të ndodhë më pas?
Në kushtet ku ndodhemi, do mjaftonte Venecia. Por dhe këtë Meta ka vendosur ta kontestojë, në ato opinione që s’vijnë për osh. /tesheshi.com/
