Ky është titulli që Marca spanjolle ofron në variantin në anglisht për duelin gjysmëfinal të Champions League-s mes Atletikos së Madridit dhe Bajernit të Mynihut.
Dy takimet gjysmëfinale midis këtyre ekipeve nuk do të jenë vetëm një betejë në fushë, por dhe një betejë taktike mes dy trajnerëve, sugjeron Marca.
Si Simeone dhe Guardila e dinë se çfarë duan. Spanjolli dhe argjentinasi përfaqësojnë dy stile futbolli. Ata janë të mbërthyer fort pas ideve të tyre.
Bajerni i Guardiolës gëzon zotërimin e topit, duke kërkuar t’i godasë kundërshtarët duke qenë protagonist. Atletiko e Simeones nuk e vret mendjen për zotërimin e topit nga kundërshtari, por si synim ka shfrytëzimin e hapësirave.
Një numër i vogël ekipesh, vijon analizën e vet Marca, bëjnë më pak gabime se Atletiko e Madridit, apo mbase nuk ka një ekip të tillë që të gabojë më pak se madrilenët. Duhet gjak, djersë e lot, për të krijuar një rast kundër tyre.
Prandaj nuk do të jetë e habitshme nëse do ta shohim një ekip të lumtur të mbajë topin, e tjetrin të luftojë pa të. Të dyja skuadrat janë të ndërtuara mrekullisht. Janë dy palë të mëdha!
Guardiola ka fituar gjithçka me Barcelonën, duke i vijuar sukseset me Bajernin e Mynihut, ku i mungon fitimi i Champions League-s.
El Cholo, apo ndryshe, Diego Simeone, thotë Marca, e ka vendosur Atletikon e Madridit me shkronja të mëdha në hartën e futbollit europian. Një Ligë Europe, një Superkupë Europiane, një Kupë Mbreti, Superkupa spanjolle, një titull i La Ligës, e finalist i Champions League-s, kjo është ajo çfarë ka arritur Diego Simeone me një ekip që e mori të sapoeliminuar nga Kupa e Mbretit prej një kundërshtari të kategorisë së dytë.
I vetmi duel mes Simeones dhe Guardiolës ka qenë ai i 26 shkurtit 2012, kur Barcelona fitonte 1-2. Që nga ajo vënie ballë për ballë e katër viteve të shkuara, ata kanë prirë në futbollin europian.
Kur ata të ribashkohen për betejë në gjysmëfinalet e Champions League-s, bota e futbollit do të jetë duke pritur me padurim ballafaqimin midis dy prej trajnerëve më të mrekullueshëm të Europës, përfundon sportivja spanjolle Marca. /tesheshi.com/
