Teraqinjtë e duhanit, sidomos ata në mbi 50 vjeç e sipër, edhe sot kujtojnë emra të ndryshme paketash që kanë qarkulluar ndër vite si prodhim shqiptar, ku veçohet “Partizani” i famshëm me një cilësi, paketim e dizanj të rëndomtë, por që preferohej nga masa e gjerë e të këputurve ekonomikisht nën komunizëm.
Ndërsa luksi i përkiste ish-Nish Cigares Durrës “Telat Noga”, prodhimet e së cilës shkonin në gjithë botën. Llogaritet që të ketë patur 57 lloje emra paketash dalë nga kjo fabrike me nam për kohën, aq sa dhe kur erdhën trupat italiane të operacionit humanitar “Pelikan”, aty nga viti 1992, kërkonin prodhime të kësaj fabrike.
Por ndër 57 emra, ka veçuar prej tyre njëri që pak ose aspak njihet, “Ermir”. Bëhet fjalë për një prodhim me seri të kufizuar, dalë në qarkullim në vitin 1970. Në këtë rast, interesant është fakti se me këtë emër, “Ermir”, që bart konontacionin pozitiv të erës së mirë, apo më poetikisht – aromës së këndshme, serviret diçka që ka erën e rëndë, siç është duhani. /tesheshi.com/
