Atë çka e bënte kryetarja e qytetit të Tetovës në Maqedoni, Teuta Arifi, gjatë fushatës elektorale para se të fitojë mandatin e saj, tani të rinjtë e lëvizjes “Besa” po ia rikujtojnë.
Forumi Rinior i kësaj lëvizjeje në Tetovë përmes një aksioni simbolik i‘a ka renditur kryekomunares Arifi të gjitha mospërmbushjet e premtimeve të saj elektorale, gjithnjë sipas gjykimit të tyre.
Pra, nëse dikur zonja Arifi zhvillonte fushatën elektorale duke i rrethuar gropat e hapura në rrugët e Komunës së Tetovës, sot, rinia e “Besës” e ka ftuar që bashkërisht ta bëjnë të njëjtën gjë, për t’ia rikujtuar se pushteti në qeverisjen lokale u ndërrua, por gropat mbeten të njëjta.
Të rinjtë më pas kanë shkuar në zyrat e komunës për ta takuar kryetaren, Arifi, por ajo nuk i ka pritur. /tesheshi.com/
