E përmendi kryeministri Conte, po përmendet dhe në Bruksel një i ashtuquajtur “plan rindërtimi”, siç Rama në Shqipëri ka emërtuar rehabilitimin nga pasojat e tërmetit të 26 nëntorit.
Bashkimi Evropian po projekton një recesion për vitin 2020, tha të hënën Komisioneri Evropian për Tregun e Brendshëm Thierry Breton.
Ai nuk ka dhënë një vlerësim të asaj që do të jetë, por parashikon që ndikimi global i koronavirusit në rritjen evropiane do të jetë midis 2 dhe 2.5 përqind, raportoi AFP.
“Para krizës, rritja e parashikuar ishte 1.4 përqind për të gjithë kontinentin. Ne mendojmë se do të kemi një ndikim midis 2 dhe 2.5 përqind në rritje”, tha Breton për BFM Business.
Ky do të ishte një recesion prej të paktën 1 përqind.
Breton tha se vendet evropiane menjëherë mund të zbatojnë rregullat e Paktit Evropian të Stabilitetit për t’u marrë me krizën.
I pyetur në lidhje me mundësinë e një plani evropian për rindërtim, ai tha se tani ishte shumë herët për të folur në detaje në lidhje me të, por tregoi se ishte e mundur që një plan i tillë të ishte në një kohë të caktuar.
Ai tha se në përgjithësi kur ka një recesion, ekzistojnë “plane rindërtimi”. /tesheshi.com/
