Nga Ylli Pata
Ka ndodhur shumëçka në 24 orë në politikën shqiptare duke u përmbysur e gjithë situata kaotike që kulmonte çdo të enjte me të shara e krisje në parlament, kurse të shtunave me përplasje te parku i liqenit.
Të premten, të gjitha ditën kancelaritë antagoniste heshtën dhe u vunë në punë detashmentet e dyta mediatike.
Ndërsa mbështetesit e qeverisë i bëjnë hosana takimeve të Edi Ramës dhe flasin edhe me detaje për të bërë “qoka” personale, kundërshtarët e kryeministrit arrijnë në një situatë më absurde, duke sjellë në vëmendje rregulla e protokollare nëse ishte vizitë shtetërore apo personale, takimi i Edi Ramës në Shtëpinë e Bardhë; madje duke e relativizuar që “hë mo se Barack-u është në largim”.
Në fakt, vizita e kreut të qeverisë shqiptare ia vlen të analizohet me detaje për atë që ndodhi, u arrit, dhe çfarë do të sjellë në marrëdhëniet mes dy vendeve. Duhet thënë se ishte një vizitë e karakterit të ngushtë politik, ku i mungoi dimensioni ekonomik, për të cilët shqiptarët kanë shumë nevojë. Kur Vuçiç ishte në SHBA arriti të marrë më shumë feedback.
Vizita e Ramës në SHBA nuk ishte vetëm në Shtëpinë e Bardhë, por edhe në Bankën Botërore, FBI, Kongres e Senat dhe ia vlen të analizohet në detajet e saj dhe kompleksitetin që paraqet, pa u përfshirë doemos në pozita partizane.
Edi Rama, edhe pse është kreu i një force politike, aktualisht përfaqëson qeverinë e Shqipërisë e si e tillë duhet bërë analiza. Në një marrëdhënie, në fund humbim ose fitojmë të gjithë e jo vetëm një figurë politike.
Por ajo që bëri përshtypje është përmbysja e gjërave në momentin e fundit.
Që sot, politika shqiptare nuk do të jetë si më parë dhe pritshmëria e SHBA-së dhe BE-së ka faktorin kohë si bazë.
Në deklaratën e firmosur së fundi nga ambasada amerikane dhe ajo e Bashkimit Europian theksohet qartë:
“U bëjmë thirrje të gjitha partive politike që të dëgjojnë 91% të shqiptarëve që e mbështesin këtë reformë të rëndësishme, duke e çuar atë drejt përfundimit me sukses pa vonesa apo pengesa. Të gjitha partitë politike kanë një rol në këtë proces dhe kanë përgjegjësinë madhore për të arritur një marrëveshje”.
Duhet pritur dhe fillimi i javës së ardhshme për të parë me detaje çfarë ka ndryshuar në politikën e Tiranës. Por fakt është se ndjehet një ankth i madh përreth…/tesheshi.com/
