Nga Bujar M. Hoxha
Mund të fitojë Atletiko ndaj Barcelonës? Mundet!
Mund të fitojë Atletiko ndaj Bajernit të Mynihut? Mundet!
Mund ta fitojë Atletiko Champions League-n me Realin në finale? Kurrë!
Ky është rasti tipik kur komshiu të kthehet në armik, në makth, në depresionues, në varrosës objektivash, në nxitës të shpërthimit të lotëve.
Vërtet, bëhet fjalë vetëm për futboll, ama dhe futbolli është përjetim, emocion, ankth, jo thjesht një top në rrjetë!
“Fati është fat, dhe ai nuk ishte në anën tonë.” Kaq i mbetej për të thënë Diego Simeone-s, të palëkundurit që mbrëmë është parë për herë të parë të bjerë në gjunjë, i pafuqishëm para asaj që i kishin parë sytë.
Prandaj Madridi është i ndarë prej mesnatës së mbrëmshme: njëra pjesë qan, tjetra qesh e feston!
Dihej që kështu do të ngjiste që prej ditës kur Reali dhe Atletiko u përcaktuan si finalistët e Champions League-s. Por askush nuk e dinte se të qeshurit do të ishin përsëri të njëjtët, siç kishte ndodhur këtu e dy vite të shkuara, ashtu siç do të ishin të njëjtë lotuesit.
Reali do ta kishte rrugëtimin më të lehtë në fazën finale të aktivitetit, ndryshe Atletikos, që me shpirt ndër dhëmbë do t’i kalonte kundërshtarët.
Rivalët e Realit të bëjnë për të qeshur: Volfsburgu në çerekfinale, edhe pse do të fitonte në ndeshjen e parë, Mançester Siti në gjysmëfinale. Gjermanët ia dalin sidoqoftë të ndjellin frikë te madrilenët. Anglezët ia dalin t’i vënë në gjumë gjithë ndjekësit e futbollit me mediokritetin e tyre në fushë.
Rivalët e Atletikos të fusin drithërimat: Barcelona në çerekfinale, Bajerni i Mynihut në gjysmëfinale. Vetëm futbollistët e Atletikos, së bashku me trajnerin e tyre që nuk e mban vendi për asnjë çast, e dinë se çfarë hoqën për t’i eliminuar dy gjigandët e futbollit botëror!
Një përpjekje kolosale e çuar dëm!
Reali i Madridit luan për herë të katërmbëdhjetë në finalen e Champions League-s, dhe e siguron trofeun e 11-të. Atletiko e Madridit luan për herë të tretë në finale, për të mos e provuar asnjëherë gëzimin e mbajtjes së trofeut në duar.
24 maj 2014! Në “Estadio da Luz” të Lisbonës luhet akti i parë i mallkimit mbi Atletikon.
Finalja e Champions League-s: Real – Atletiko!
Godin ka shënuar që në minutën e 36-të. Atletiko kryeson 1-0. Minuta e 93-të! Pak çaste kanë mbetur. Mos! Sergio Ramos ka kërcyer fuqishëm me kokë: 1-1. E pabesueshme!
Gjithçka më pas është e thjeshtë për Realin, që fiton 4-1. Atletiko e mbyll kokulur një sezon fantastik. Nuk e meritonte!
22 prill 2015! Në “Santiago Bernabeu” të Madridit luhet çerekfinalja e dytë e Champions League-s për sezonin 2014-2015.
Reali dhe Atletiko përsëri karshi! Ndeshja e parë është mbyllur 0-0.
Kështu duket se po shkon dhe e dyta. Por jo! Speci djegës është ruajtur përsëri për në fund. Javier Hernandez është ndëshkuesi këtë herë. Në minutën e 88-të! 1-0!
Përsëri Reali i këput ëndrrën në mes Atletikos!
28 maj 2016! Në “San Siro” të Milanos luhet akti i tretë i përballjes madrilene.
Finalja e Champions-it: përsëri Real – Atletiko!
Reali ka një fillim të pazakontë. Tejet shpërthyes. Një skemë e menduar mirë. Ronaldo është tërësisht në hije, pasojë e një dëmtimi. Por Bale është fantastik! Bën gjithçka, e krijon vazhdimisht panik te kundërshtari.
Ç’bëhet kështu? Përsëri Sergio Ramos! Minuta e 15-të! Lojtari që nuk kishte shënuar në këtë veprimtari që prej asaj finaleje të dy viteve më parë, e gjen sërish rrjetën ndaj të njëjtit rival.
Shenja e fatalitetit jepet që me nisjen e pjesës së dytë. Griezmann dështon ta kthejë një 11-metërsh në gol.
Dhe ja ku shfaqet belgu i parë që shënon në një finale të Champions League-s. Carrasco vendos barazpeshën në minutën e 79-të. 1-1!
A thua mbaroi puna për Ramos-in? Jo! Rishtas e 93-ta minutë. Ramos e pret më dysh Carrasco-n në mesfushë, e hedh përtokë. Përsëri Ramos në vendin e duhur, në kohën e duhur. Ndryshe… mbase Atletiko do të gëzonte.
11-metërshat në fund janë qershia mbi tortë për Realin: 5-3!
11-metërshat në fund janë kapaku i fatkeqësisë së Atletikos! Përsëri humbës!
Zidane kthehet në arkitektin e fitores, Simeone në arkitektin e humbjes! Eshtë çmimi që duhet paguar!
“Jam i sigurt se ata do ta fitojnë atë [Champions League-n] në të ardhmen,” thotë me tërë zemër Florentino Perez, presidenti i Realit, për Atletikon.
A thua? Me sa duket jo, sa të jetë Reali përballë.
Beteja vazhdon! Macja e zezë është përsëri aty! /tesheshi.com/
