Nga Mensur Krasniqi
Një precedent i rëndë mediatik e politik shoqëroi orët e fundit të mandatit të Gruevskit për të formuar qeverinë e re, teksa ishte në pritje të përgjigjes nga BDI. Një pjesë e mediave në Tiranë, të konsideruara si serioze, si Top Chanel apo Java News, dhanë lajmin e arritjes së një marrëveshjeje mes tyre dhe shkuarjes pra drejt një qeverie të përbashkët, duke u shoqëruar kjo dhe me detajin e 8 ministrive dhe të kreut të parlamentit marrë nga shqiptarët, e sigurisht dorëzimit të kreut të VMRO-së ndaj kërkesës për dygjuhësi, e vënë kjo si kusht në Platformën e përbashkët.
Por nuk u mjaftua me kaq. Reagimet që e morrën të mirëqenë këtë fakt pasuan nga politikanë seriozë, si Pandeli Majko e Tritan Shehu, apo nga analistë si Skënder Minxhozi, duke mbërritur më pas me vetë Partinë Demokratike që lëshoi një deklaratë zyrtare ku përshëndetej qeveria e re e koalicionit VMRO-BDI. Kjo bëri që nga selia e kësaj të fundit të dilte zëdhënësi në orët e vona të së dielës për të kumtuar se asgjë nuk është e vërtetë.
Por si është përjetuar në ambientin maqedonas kjo gafë e vëllezërve nga Shqipëria.
Për doktorin i shkencave të komunikimit, Sefer Tahiri, kjo tregon se sa afër e sa larg njëkohësisht jemi ne, dy pjesët shqiptare me njëra-tjetrën. Në profilin e tij në rrjetin social facebook ai ka shkruar kështu:
“GAFA E VËLLEZËRVE NGA SHQIPËRIA!
Çfarë dëshmon gafa e PD-së, Pandeli Majkos, Tritan Shehut e shumë vëllezërve të tjerë nga Shqipëria, të cilët si duket ranë pre e lajmeve të rejshme mediatike, të cilat thonin se BDI dhe VMRO kanë zyrtarizuar gjuhën shqipe, BDI do ketë 8 ministri(bile edhe MPB), kreun e Kuvendit e ku ta di se çfarë? Aq larg jemi, aq barriera komunimi kemi, aq shumë u besojmë lajmeve apo aq shumë dëshirë patën që BDI të shkojë në koalicion me VMRO-DPMNE-në, siç dëshironin edhe disa emra të njohur mediatik të Kosovës dhe Shqipërisë.
Gafa është shqetësuese, PD të kërkojë falje publike! Sa pak njihemi, sa pak komunikojmë, sa pak dimë për njëri tjetrin dhe sa i largët është bashkëpunimi i mirëfilltë. Pa komunikim, nuk ka njohje, pa komunikim më shumë do jemi komshinj se sa vëllezër.
E kam përmendur njëherë që në komunizëm “Kinezët ishin vëllezër, ndërsa kosovarët miq”. Kinezët nuk janë, por ne trajtohemi si miq apo si komshinj!”.
Po ashtu, edhe për Benjamin Arifin, anëtar i Këshillit Drejtues të Shoqatës së Gazetarëve të Maqedonisë, ajo çka ndodhi me disa nga mediat Shqipërisë, tregon qasjen e tyre joserioze ndaj shqiptarëve të Maqedonisë.
“Nga raportimi dhe debati sipërfaqësor, me bashkëbisedues të painformuar dhe jokompetent, mediet tradicionale nga Shqipëria kaluan edhe në dezinformim klasik, të papranueshëm për namin dhe emrin që me vite kishin krijuar në trevat shqiptare. Edhe më skandaloz ishte reagimi i një partie politike që uronte arritjen e një koalicioni të paqenë, që të bën të mendosh se edhe faktori politik shqiptar, informohet për zhvillimet në Maqedonia nga mediet që nuk kanë as zyra në Shkup. Uroj që Tirana zyrtare dhe ajo mediatike të fillojë të trajtojë me seriozitet çështjen e shqiptarëve të Maqedonisë”, tha Arifi për tesheshi.com.
Nga ana tjetër, gazetari i agjencisë së lajmeve Anadolu Agency, Bekim Laçi ka propozuar sjelljen e një ligji mbikëqyrës mbi portalet informative të cilat shpeshherë shërbejnë si referencë për mediumet serioze.
“Urgjentisht kemi nevojë për ligj i cili do të rregulloj veprimtarinë e portaleve informative, sepse dua ta dij kush qëndron prapa një lajmi apo teksti të botuar, pra të ketë një impresum, si dhe PREJ KU I KANË FINANCAT, sepse vetëm ashtu krijohet besueshmëria te lexuesi.
Është e dhimbshme kur një parti serioze siç është Partia Demokratike (PD) e cila madje ka qeverisë me Shqipërinë, të urojë krijimin e qeverisë duke u bazu në lajme portalesh të cilat rezultuan të rreme”, ka shkruar Laçi në FB.
Por më i rëndë se dezinformimi mediatik në këtë rast, ka qenë nxitimi i një partie të madhe siç është PD-ja, e cila nuk ngurroi aspak të dilte me deklaratë zyrtare, edhe pse zotëron pa dyshim të gjitha mekanizmat filtrues dhe burimet konfirmuese më speciale se mediat, pasi mbajnë kontakte direkt me lidershpin e BDI-së. /tesheshi.com/
