Shumë qytete spanjolle janë mbuluar nga pluhuri i verdhë për shkak të stuhisë nga Sahara, raporton Anadolu Agency (AA).
Në shumë qytete nga jugu në veri të Spanjës, rrugët dhe makinat ishin të mbuluara me pluhur të verdhë. Mëngjesin e sotëm, spanjollët gjetën automjete të mbuluara tërësisht me pluhur, gjë që shkaktoi turma të mëdha në lavazhe, ndërsa tregtarët u detyruan të pastronin xhamat e dyqaneve.
Retë e verdha të rërës së shkretëtirës mbuluan shumë qytete si kryeqytetin Madrid, Alicante, Segovia, Almeria, Leon, Valladolid, Murcia, Burgos dhe Avila. Kjo gjithashtu rrit ndotjen e ajrit.
Ekspertët paralajmëruan veçanërisht që të moshuarit me probleme të frymëmarrjes të mos dalin në rrugë dhe të anulojnë aktivitetet në natyrë.
Duke deklaruar se nga shkretëtira e Saharasë vjen një “re e jashtëzakonshme pluhuri” me efektin e stuhisë Celia, meteorologët thanë se një re kaq e dendur pluhuri është shumë e rrallë në Gadishullin Iberik dhe se është një ngjarje historike. /tesheshi.com/
